Një kompani me seli në Elbasan, e njohur si “Orti”, ka shpallur falimentin me vendim të Gjykatës së Rrethit Gjyqësor Elbasan, duke lënë pas një valë shqetësimi për dhjetra kreditorë dhe miliona euro borxhe të papaguara. Nisma për shpalljen e falimentit është kërkuar nga Raiffeisen Bank, e cila rezulton të jetë edhe kreditori më i madh i kompanisë.
Sipas vendimit të gjykatës, “Orti sh.p.k.” në vitin 2015 ka përfituar një kredi prej 4 milionë eurosh nga Raiffeisen Bank, e cila nuk është shlyer deri më sot. Kjo e bën bankën subjektin më të dëmtuar nga situata financiare e krijuar.
Në listën e kreditorëve të dëmtuar renditet më pas Administrata Tatimore Shqiptare, ndaj së cilës kompania ka një detyrim prej 2.3 milionë eurosh. Këto borxhe përfshijnë tatimin mbi fitimin, TVSH-në dhe kontributet e sigurimeve shoqërore dhe shëndetësore për punonjësit.
Një tjetër institucion publik që ka pësuar humbje nga falimentimi i “Orti” është Operatori i Shpërndarjes së Energjisë Elektrike (OSHEE), me një borxh të papaguar prej 500 mijë eurosh për fatura energjie.
Vendimi i gjykatës zbulon gjithashtu se “Orti sh.p.k.” ka lënë në vështirësi financiare të paktën 40 biznese private, të cilat kanë qenë furnitorë ose nënkontraktorë të kompanisë. Lista e borxheve të papaguara nga “Orti” është e gjatë dhe përfshin një numër të konsiderueshëm biznesesh të vogla dhe të mesme në zonën e Elbasanit dhe më gjerë.
Përplasjet mes kreditorëve janë intensifikuar për shkak të numrit të madh të urdhrave përmbarimorë, duke krijuar një garë se kush do të arrijë të rekuperojë i pari një pjesë të borxheve nëpërmjet ekzekutimit të aseteve të mbetura të kompanisë.
Gjykata e Elbasanit ka emëruar Aida Nurin si administratore të falimentimit, duke i dhënë asaj detyrën e menaxhimit të procesit dhe shpërndarjes së mundshme të aseteve tek kreditorët. Gjithashtu, gjykata ka njoftuar të gjithë kreditorët e “ORTI sh.p.k.” që të paraqesin pretendimet e tyre pranë administratores së falimentimit brenda një afati 45-ditor nga data e shpalljes së vendimit.
“Orti sh.p.k.”, e themeluar në vitin 2006 me pronar Kadri Mehallan, ka operuar aktivisht deri në vitin 2018, kur më pas ka kaluar në status pasiv.
Megjithatë, pas kësaj periudhe, kompania la pas një volum të konsiderueshëm borxhesh dhe një numër të madh kreditorësh, të cilët tani do të duhet të presin përfundimin e procedurës së falimentimit për të kuptuar nëse do të mund të rikuperojnë ndonjë pjesë të fondeve të humbura.
Ky rast nxjerr në pah sfidat dhe rreziqet e biznesit, si dhe ndikimin e falimentimeve të tilla në ekonominë lokale dhe komunitetin e biznesit. Ende nuk dihet se sa nga totali i borxheve do të mund të shlyhen dhe çfarë do të ndodhë me asetet e kompanisë “Orti”.
Discussion about this post