Pesë vlonjatë bëhen objekt i një tjetër kërcënimi të njerëzve të drejtësisë që doli në “sipërfaqe” vetëm ditën e djeshme. Ata kanë qenë nën akuzë për një atentat, për fat të dështuar ndaj një të riu në qytetin e Vlorës dhe janë arrestuar, por gjithnjë kanë pretenduar se Gjykata asnjëherë nuk i dëgjoi pretendimet e tyre.
Trupa gjykuese në Apel pretendon se është kërcënuar në sallën e gjyqit nga këta 5 të pandehur, të gjithë nga Vlora, por nuk kanë kërkuar asnjë mbrojtje pranë “qeverisë’ së Gjyqësorit. Bëhet fjalë për tri gjyqtare, të tria pjesëmarrëse në vendimin e dënimit prej 150 vjetësh burg nën akuzën e “vrasjes në rrethana të tjera cilësuese, mbetur në tentativë”!
Dje, për kërcënimin ka reaguar Gjykata e Lartë dhe Këshilli i Lartë Gjyqësor duke dalë në mbështetje të plotë dhe të njëjtë për gjyqtarë dhe magjistratë. Gjykata e Lartë në një deklaratë të gjatë ka bërë me dije se është në krah edhe të dy prokuroreve të cilat u zbuluan se ishin të rrezikuara seriozisht nga banda gjaksore e Lushnjës, të cilët i denoncoi një nga vrasësit më mizor të grupit, që vendosi të bashkëpunonte me Prokurorinë e Elbasanit.
KËRCËNIMI I GJYQTAREVE
Me datë 15 shtator, në Komisariatin e Policisë nr. 1 ëshët bërë një denoncim për kanosje nga tri gjyqtare. Ngjarja u mësua ditën e djeshme pasi Prokuroria e Tiranës ka nisur hetimet për kanosje për shkak të detyrës të gjyqtareve Valdete Hoxha, Lutfie Çelami dhe Edlira Petri, të cilat denoncuan sulmin dhe kërcënimet për jetën.
Gjyqtaret kanë kërkuar ndihmën e Policisë së kryeqytetit menjëherë pasi shpallën nga 35 vjet burg për shtetasit Daut Elmazi dhe Gentian Zoto, dënimin me 30 vjet burg për Igli Memaj dhe nga 25 vjet për Serxho Ademin dhe Albano Goxhaj. Të tria gjyqtaret u kërcënuan në sallën e Gjykatës së Apelit nga të afërmit e të akuzuarve, ditën kur u dënuan për akuzën e vrasjes në rrethana cilësuese të ngelur në tentativë.
Të pestë vlonjatët, të cilët mungonin ditën e verdiktit akuzohen se në maj 2019 qëlluan me armë zjarri përmes një automjeti në lëvizje e sipër, duke pasur si shënjestër Ines Hajrullën, një kundërshtar i tyre në fushën e krimit. Por të akuzuarit këmbëngulin se vendngjarja është manipuluar nga policia lokale e asaj kohe dhe se gjykatat nuk i konsideruan drejt provat e tyre.
Asnjëra nga gjyqtaret nuk ka kërkuar mbrojtje pranë KLGJ, ndërkohë që Policia i ka shtuar masat për të tria gratë e drejtësisë. Sakaq, trupa gjyqësore e Gjykatës së Lartë reagoi për të gjitha kërcënimet e gjyqtarëve dhe magjistratëve, përfshi edhe kërcënimin e dy prokuroreve Doloreza Musabelliu të SPAK dhe Merita Sinani, të përmendura nga grupi kriminal i Lushnjës sepse hetuan dhe çuan prova konkrete për dy anëtarët Orgest Bilbili dhe Anterio Kaloshi.
Ndërkohë që po vijon hetimi, mësohet se tri gjyqtareve nuk I është caktuar mbrojtje e posaçme nga Këshilli i Lartë Gjyqësor. Pas publikimit të rrëfimit të të penduarit të drejtësisë Artan Tafani, i cili ka treguar se Laert Haxhia ishte ne përgatitje për të vrarë dy prokuroret Doloreza Musabelliu dhe Merita Selimi, të cilat e kanë hetuar për masakrën e Lushnjës. Anëtarët e gjykatës së Lartë dhe Këshilli i Lartë Gjyqësor kanë dënuar kërcënimet ndaj njerëzve të drejtësisë duke bërë thirrje për hetimin e këtyre rasteve.
ATENTATI
Sipas Prokurorisë së Vlorës, Inez Hajrulla në datën 10 maj 2019 ka qenë nën shoqërinë e Ervis Matodashaj, në ambientet e një lokali në Vlorë. Pikërisht në këtë vend disa persona kanë qëlluar me armë me qëllim për të vrarë Inez Hajrulla.
Nga këqyrja e vendit të ngjarjes ka rezultuar se në shesh janë gjetur dy gëzhoja dhe një fishek i pa goditur. Si pasojë e këtyre të shtënave është plagosur rastësisht Dajko Canodemaj, i cili ka qenë duke pirë kafe. Në ikje e sipër autorët e këtij krimi që ndodheshin brenda një automjeti tip “Land Rover” me ngjyrë jeshile dhe që në kokë mbanin maska, janë përplasur me dy automjete të rastit në afërsi të bashkisë Vlorë, dhe më pas kanë ikur në drejtim të fshatit Babicë.
Policia u është vënë në ndjekje këtij automjeti dhe në afërsi të Babicës së Vogël, automjeti është gjendur i djegur. Brenda në automjet ndodheshin dy automatikë të djegur plotësisht dhe një dorezë plastike e djegur pjesërisht. /Panorama/
Discussion about this post