Një person i rëndësishëm i botës së krimit është përgjuar duke planifikuar grabitjen e 613 kg kokainë të sekuestruar në portin e Durrësit në vitin 2018 dhe që aktualisht ndodhet në laboratorin e kriminalistikës së policisë.
Ky detaj është zbuluar nga gazetarja Klodiana Lala në emisionin “Opinion”, ku ajo tha se fillimisht plani ka qenë për grabitje me forcë të kokainës, por më pas është diskutuar që droga të vjedhet duke e zëvendësuar atë me një lëndë të ngjashme me kokainën.
Sipas gazetares, SPAK ka nisur verifikimet dhe po analizon të gjitha pakot e kokainës për të zbuluar nëse ka patur apo zëvendësim të drogës.
“Një individ i lartë i botës së krimit është shprehur në aplikacionin SKY që të godisnin drogën e sekuestruar nga policia, për 613 kg kokainë që iu sekuestruan Arbër Çekajt. Qëllimi ishte për ta vjedhur. Për drogën e sekuestruar bëhen e analizat dhe vërtetohet që është e gjitha drogë.
Dyshimet janë që ky grup kriminal e ka patur të pamundur të qëllosh me armë laboratorin shkencorë të policisë dhe ka zgjedhur një mënyrë tjetër për ta marrë drogën, duke e zëvendësuar më një lëndë tjetër të ngjashme me drogën. SPAK po e verifikon këtë.
Po bëhen analiza për të parë nëse dorga e sekuestruar është kokainë apo është zëvendësuar. Bëhet fjalë për periudhën 2019-2021. SPAK ka refuzuar të kthej përgjigje për këtë edhe pse i kemi kërkuar informacion për këtë.
Policia ka konfirmuar se ka një urdhër që të merren kampione për të parë nëse droga nuk është zëvendësuar. Në atë kohë drejtor i Policisë së Shtetit ka qenë Ardi Veliu, ndërsa aktualisht është drejtori i strukturës që heton policët. Pra, i bi që të hetojë veten.
Por duhet thënë që SPAK po kryen prova për secilën pako”, tha Lala.
Discussion about this post