Rreth gjysëm ton kanabis u bllokuan nga autoritetet malazeze në një kamion që udhëtonte nga Shqipëria drejt malit të Zi.
Autoritetet malazeze kanë ndaluar babë e bir, shtetasi K.O dhe I.O, të cilët ndodheshin në një kamion tip “Renault”.
Kamioni, i cili transportonte paleta, kishte destinacion Austrinë.
Ndërkohë “Vijesti” ka dhënë detaje për drogën e sekuestruar në pikën kufitare të Bozhajt në kufirin mes Malit të Zi dhe Shqipërisë.
Droga u gjet gjatë kontrollit të kamionit të mallrave me targa shqiptare, e cila kishte hyrë nga territori i Shqipërisë.
Droga u zbulua nga doganierët në bashkëpunim me kolegët e Drejtorisë së Policisë, mësohet për “Vijesti”.
“Treguesit e rrezikut dhe alarmi i shfaqur në sistemin e brendshëm doganor kanë sjellë këputjen e zinxhirit të kontrabandës nga Shqipëria drejt Bashkimit Europian.
Veprimi i sekuestrimit është nisur në bazë të autorizimit dhe analizës doganore të kryer të të dhënave të inteligjencës të Sektorit për Siguri dhe Kontroll Doganor,” bënë të ditur në një njoftim autoritetet malazeze.
Nga fotot e publikuara nga media malazeze shihet që lënda narkotike e ndarë në pako, ishte e vendosur në mes të dërrasave brenda një kamioni.
Me urdhër të Prokurorisë së Lartë të Shtetit në Podgoricë janë arrestuar dy shqiptarë 60 dhe 24 vjeç.
Ata dyshohen për vepër penale – prodhim, posedim dhe shpërndarje të lëndëve narkotike.
“Droga u gjet në një kamion me targa shqiptare dhe ishte vendosur në hapësirën e ngarkesave të kamionit dhe e siguruar me vulë doganore nga një administratë e huaj”, shkruan Vijesti.
“Policia dhe dogana, së bashku kanë kontrolluar kamionin me targa shqiptare dhe ku në hapësirën e ngarkesës, mes paletave që transportonte, kanë gjetur 185 pako me drogë me peshë totale 497 kg”, njoftoi policia e Malit të Zi.
Discussion about this post