Një biznes është mbyllur dhe 11 të tjerë janë paralajmëruar në zonën turistike të Shëngjinit, pasi janë konstatuar shkelje përsa i përket sigurisë ushqimore. Këto veprime janë ndërmarrë nga Autoriteti Kombëtar i Ushqimit, pas 190 inspektimeve të realizuara përgjatë muajit qershor.
Drejtori i AKU-së në Lezhë Besmir Frroku thotë se vëmendja maksimale është përqendruar tek sezoni turistik dhe nuk do të ketë tolerime, ndaj subjekteve që nuk do garantojnë siguri ushqimore.
“Konkretisht gjatë qershorit kemi realizuar rreth 190 inspektime, nga të cilat kemi bërë 11 paralajmërime. Paralajmërimi është bërë për shkelje të vogla të konstatuara. Kemi bërë një mbyllje aktiviteti, pas një indicje të marrë nga komisariati i Lezhës. Kemi vendosur një gjobë në vlerën 3 milion lekë, ku kemi bllokuar dhe produktin që nuk garantonte origjinën nga kishte ardhur, dhe e kemi dërguar për asgjësim.”
Autoriteti Kombëtar i Ushqimit në Lezhë bën me dije se do të jetë në teren dhe monitorim të vazhdueshëm gjatë gjithë sezonit turistik, për të garantuar siguri ushqimore për pushuesit që kanë zgjedhur bregdetin e Lezhës.
Discussion about this post