Kur dimri po ikën, Qendra Spitalore Rajonale e Tiranës “Shefqet Ndroqi” bën tenderin e lëndës ngrohëse. Por drejtoresha Silvana Bala kalendari ka vetëm një stinë. Shqetësimi i saj i vetëm është të xhirojë paratë tek llogaritë e biznesmenëve të sprovuar në tenderat e saj.
Prokurimi i fundit i firmosur në janar të këtij viti nga Bala ka numrin e referencës REF-91086-12-14-2023 dhe ka si objekt “Blerje lëndë djegëse për ngrohje, pellet në Spitalin Universitar “Shefqet Ndroqi”, Tiranë.
Është marrëveshje Kuadër me një operator ekonomik, ku të gjitha kushtet janë të përcaktuara”, me afat 24 muaj nga lidhja e MK.” E pra, marrëveshje të thella abuzuese me një operatorë, që vazhdojnë e edhe pse ligji kërkon zhvillimin e garave me konkurrencë të fortë.
Kështu është tenderi i sipërpërmendur, abuzim që vazhdon ndër vite, dhe këtë herë është falur kontrata tek firma Alcani shpk.
Në fakt, në dokumente tregohet se kanë paraqitur oferta tre firma; “ALCANI” SHPK dhe “IGLI PELLET” dhe “SULOLLARI-KLIMA”. Por, edhe pse këto të fundit kishin oferta më të lira, Bala nuk ka marrë mundimin as t’i shqyrtojë, por i ka skualifikuar nga gara që në fazën e parë.
Madje njëra nga firmat pjesëmarrëse ka ofruar gati gjysmën e vlerës së propozimit të “ALCANI” SHPK dhe përsëri nuk është marrë në konsideratë. Përfundimisht fituese është shpallur kompania e Shaqir Alcanit për vlerën 63,876,360 lekë të reja (pa TVSH) ose rreth 640 milionë lekë të vjetra.
Fakti që kjo vlerë është sa 98% e fondit limit, i shton akoma më tej dyshimet për një tender të manipuluar ku fituesi dihej që në fillim. Në një situatë tjetër, në bazë të ligjit tenderi duhej anuluar në pritje të ofertave të përshtatshme.
Ky tender është vlerësuar nga Open Data me “Flamur të kuq”, që është shenja e riskut të korrupsionit.
Ndërkohë vlen të theksohet se pronari i firmës, Shaqir Alcani, e fiton çdo vit këtë tender nga Bala. Edhe në vitin që lamë pas, me ‘Flamur të kuq’, pra në mungesa të theksuar të konkurrencës dhe ofertë të shtrenjtë, ALCANI u shpall fitues. Kompania xhiroi 326 milionë lekë nga paratë e taksapaguesve.
Ndërkohë, Alcani vazhdon të marrë pjesën e tortës së fondeve të Shëndetësisë, edhe pse është person me precedent penal. Kujtojmë se në 2023, ALCANI u denoncua se kërcënoi biznesmenin Eral Myftaraj që të tërhiqej nga një tender me vlerë 1 milionë euro.
Epo në vendin tonë çudia më e madhe tre ditë zgjat!
Kujtojmë se paraardhësi i drejtoreshës Bala në Spitalin “Shefqet Ndroqi”, Petraq Kapisyzi është kallëzuar në Prokurori nga KLSH për kryerjen e procedurave fiktive në prokurime me qëllim favorizimin e operatorëve ekonomikë të caktuar, duke i shkaktuar buxhetit të shtetit dëm ekonomik dhe për pasojë kishte konsumuar elementët e figurës së veprave penale të “Shpërdorimit të detyrës” dhe “Shkeljes së barazisë së pjesëmarrësve në tendera apo ankande publike”, parashikuar nga nenet 248 dhe 258 të Kodit Penal. Ai dha dorëheqje në vitin 2021.
Praktika e shpërdorimit të fondeve në tendera të manipuluar vazhdon aktualisht me firmën e drejtoreshës Silvana Bala.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post