Shumë institucione kanë shprehur ankesa për shpërndarjen e buxhetit të vitit 2022. Ditën e sotme një ankesë të tillë ka bërë edhe Kryetari i Sindikatës së Punonjësve të Arsimit të Lartë, Sandër Kovaçi. Gjatë fjalës së tij në Komisionin e Edukimit dhe Mjetet e Informimit Publik, ai ngriti shqetësimin për nivelin e pagave për pedagogët. Sipas tij, nuk është aspak e drejtë që edhe për 2022 nuk parashikohet asnjë indeksim për ta, duke thënë se pedagoget paguhen edhe më keq se në Kosovë.
“Ne prisnim të paktën në këtë buxhet të futej një koeficient për rritjen e rrogës së pedagogëve. Mund të them se janë krejtësisht të pamjaftueshme për nivelin që kanë prekur çmimet në vend. Me këto paga kemi çdo ditë aplikime të pedagogëve për të shkuar jashtë. Po na largohen pedagogët, do vijë një situatë që s’ke ku i merr. Nuk po them që të garantohen rroga të krahasueshme me nivelin europian, por aktualisht ato janë 40 për qind më ulët se niveli i Kosovës. Të paktën t’i afrohemi Kosovës, nuk po them për Malin e Zi etj, etj. Të paktën ministrja duhet ta trajtojë se rritja e pagave në kuadër të autonomisë së universiteteve nuk është e vërtetë”, tha ai.
Kovaçi bëri me dije se i ka dërguar një letër Kryeministrit dhe ministres së Arsimit një listë kërkesash, por që deri më tani nuk i është kthyer asnjë përgjigje.
“Ne i kemi dërguar edhe kryeministrit dhe ministres së Arsimit një listë kërkesash por deri më tani nuk na ka ardhur asnjë përgjigje. Edhe në kohën e Enver Hoxhës, ku do që të ishe të vinte një letër nga kryeministri i Shqipërisë. Edhe Ministria e Arsimit fle gjumë, e ka lexuar apo jo, ne s’dimë gjë, por fakti se nuk ka reaguar ndaj kërkesave tona tregon që s’e ka lexuar fare. Në këtë prizëm koncepti i raportit me sindikatën duhet të jetë raport transparence”, u shpreh ai, duke vënë në dukje se qeveria e ka lënë fare në harresë këtë kategori. E.H/gijotina.com/
Discussion about this post