Agjencia Kombëtare e Shoqërisë së Informacionit po përballet përsëri me dyshime serioze për manipulim të procedurave të prokurimit publik. Këtë herë, në qendër të akuzave është tenderi me vlerë rreth 2.6 milionë euro për ngritjen e sistemit elektronik të titujve akademikë, gradave shkencore dhe revistës shkencore në Republikën e Shqipërisë.
Sokol Sinani, administrator i Intech+ dhe ish-ortak i Ilir Beqjes, ka depozituar dy ankesa pranë Komisionit të Prokurimit Publik, duke pretenduar se kriteret e vendosura nga AKSHI janë hartuar posaçërisht për të favorizuar një kompani të vetme në treg.
Në thelb të konfliktit është kërkesa e AKSHI-t për personel të pajisur me certifikata sigurie CSP dhe një Oficer Sigurie Industriale, kriter që sipas Intech+ nuk mbështetet në asnjë argument ligjor apo teknik.
Sipas dokumenteve, Komisioni i Prokurimit Publik ka konstatuar se AKSHI nuk ka justifikuar pse tenderi duhet trajtuar si proces që përfshin informacion të klasifikuar, por megjithatë, ndryshimet e kërkuara nga KPP nuk janë reflektuar në dokumentet e rishikuara të tenderit.
Në ankesën e fundit të depozituar më 14 nëntor, Intech+ deklaron se moszbatimi i vendimit të KPP përbën shkelje të ligjit, duke lënë të hapur dyshimin se fituesi është paracaktuar, pasi vetëm një kompani plotëson kriteret e vendosura.
Që prej krijimit të saj, AKSHI është shoqëruar nga një histori e gjatë ankesash dhe dyshimesh për favorizim të një rrethi të ngushtë kompanish.
Në krye të tyre renditen Advanced Business Solutions e Gerond Meçes dhe Soft & Solutions e Horizon të Ermal Beqirit, kompani që prej vitesh ndajnë kontrata publike milionëshe dhe zhvillojnë një luftë të heshtur për dominim në tregun e IT-së shtetërore, përfshirë përdorimin e mediave për sulme direkte ose indirekte kundër njëra-tjetrës.
Edhe vetë Intech+, e lidhur me Ilir Beqjen, ka qenë një përfitues i rëndësishëm tenderësh të AKSHI-t duke marrë rreth 10 milionë euro që prej 2015.
Por pas goditjes penale ndaj Beqjes, pozitat e kompanisë kanë rënë ndjeshëm, duke e detyruar atë t’i drejtohet rrugës së ankimimit administrativ, ndërsa në treg konsiderohet gjerësisht se tenderi “ka fituesin e vet” para se gara të zhvillohet.
Discussion about this post