Situata e krijuar nga reshjet e dëborës vijon të jetë problematike, kryesisht në veri dhe juglindje të vendit. Edhe pse akset nacionale raportohet se janë të gjitha të kalueshme, rrugët rurale vijojnë të jenë të bllokuara në disa bashki të vendit.
Nga raportimet e Autoritetit Rrugor Shqiptar, të gjitha akset kombëtare janë të kalueshme.
Ndërkohë, Agjencia Kombëtare e Mbrojtjes Civile raporton se në bashkinë Dibër ka problematika në rrugët rurale në disa fshatra të njësive Maqellare, Melan, Luzni, Muhurr. Po punohet për hapjen e rrugëve që lidhin njësinë administrative Kala e Dodës me fshatrat Sllovë, Selishtë dhe Arras.
Në bashkinë Bulqizë: Janë të bllokuara rrugët rurale të njësive administrative Ostren, Trebisht, Klenjë, Gjoricë, Zerqan dhe aksi rrugor Trebisht-pikë, kalimi kufitar.
Në bashkinë Klos: janë të bllokuar rrugët e fshatrave me qendrat administrative Gurë dhe Xibër.
Në bashkinë Mat janë të bllokuara 2 fshatra në njësinë administrative Komsi dhe aksi rrugor Vig Macukull.
Në bashkinë Krujë po vijon puna për hapjen e rrugës që lidh fshatin Shkretë me aksin Cudhi-Qafështamë.
Në bashkinë Fushë-Arrëz vazhdon të jetë e bllokuar rruga me njësinë administrative Iballë me fshatrat e saj.
Në Bashkinë Devoll vijon puna për hapjen e rrugëve lidhëse me fshatrat Miras.
Në bashkinë Pogradec po punohet për hapjen e rrugëve të fshatrave Proptisht, Velçan, Trebinjë, Dardhas dhe Çërravë.
Në bashkinë Has po punohet për hapjen e rrugës që lidh njësinë administrative Arrën me rrugën nacionale dhe rrugët e fshatrave Cahan dhe Xhebexhi.
“Vijojnë angazhimin për normalizimin e situatës në Vlorë, prej tashmë tre ditësh Forcat e Armatosura me 7 pompa thithëse dhe 15 mjete të kalueshmërisë së lartë, ekskavatorë, kamionë vetëshkarkues etj”, njofton Agjencia Kombëtare e Mbrojtjes Civile.
Moti ditët në vijim – Ndërpriten reshjet
Sipas parashikimit të motit, në ditët në vijim nuk do ketë prezencë të reshjeve të shiut apo të borës në të gjithë vendin.
Temperaturat do vijojnë të ulen, ku në veri të vendit do të shkojë në -11 gradë celsius.
Probleme me energjinë elektrike, shkollat ende të mbyllura
Moti i keq ka sjellë ndërprerje të furnizimit me energji elektrike në veri të vendit dhe Qarkun e Korçës. Gjithashtu, shkollat vijon të mbeten të mbyllura në disa zona.
Discussion about this post