Kryetarja e Bashkisë së Shkodrës, Volta Ademi e ka konsideruar si të paqartë vendimin e Gjykatës Kushtetuese për rrëzimin e padisë së Shoqatës së Bashkive për vlefshmërinë e zgjedhjeve të 30 qershorit 2019.
Në një deklaratë për mediat, Ademi është shprehur se është akoma e paqartë nëse bëhet fjalë për një vendim për arsye proceduriale apo një arsyetim pas kërkesave të bëra ndaj GJK.
“Vendimi është akoma i paqartë në atë se çfarë përmban në thelb vendimmarrja, ne kemi lexuar rrëzimin e kërkesë padisë, kjo nuk thotë shumë, thotë për një votim kundër, por është akoma e paqartë nëse bëhet fjalë për një vendim për arsye proceduriale, apo për një arsyetim të thelluar që ka ardhur si shqyrtim i të gjitha kërkesave apo pyetjeve që i kemi bërë GJK. Ajo që presim është arsyetimi i plotë për të arritur të kuptojmë mendimin e shumicës apo pakicës. Kjo është një çështje me interes të madh përtej Shoqatës së Bashkive”, u shpreh Ademi.
Ndonëse nuk mban një qëndrim të prerë, Ademi lë të hapur mundësinë e një rikandidimi për kryetare bashkie.
“Vendimi i gjykatës nuk ka ndihmuar për qartësinë e institucioneve dhe kur bëhet fjalë për kryetarët apo drejtuesit e bashkive në të gjithë Shqipërinë. Duke mos ndihmuar situata e këtyre bashkive që nuk kanë kryetarë e bën të paqartë vijueshmërinë që do të kenë institucionet që të kenë kryetar të zgjedhur. Këtë duhet ta thonë institucionet, dhe situata është e pazakontë dhe nuk përcaktohet. Nuk do të hyjë më thellë, por nëse do të kemi zgjedhje nesër unë jam e angazhuar për të vijuar dhe për të mbështetur dhe punuar për Bashkinë e Shkodër, në një kontekst tjetër, që mund të jetë edhe familjar, qytetar, në varësi të një situate, pse jo dhe të një konflikti politik. Bashkia Shkodër është një institucion i rëndësishëm dhe angazhimi im nuk do të mungojë”, theksoi Ademi.
Ditën e enjte Gjykata Kushtetuese rrëzoi padinë e Shoqatës së Bashkive me pretekstin se pasi dëgjoi palët në gjykimin kushtetues, mori në shqyrtim opinionin e Komisionit të Venecias dhe vendosi rrëzimin e padisë.
Pas vendimit të Kushtetueses, i takon presidentit Ilir Meta të shpallë datën e re të zgjedhjeve lokale për gjashtë bashki.
Discussion about this post