Vijon të mbetet alarmante situata me mbeturinat në qytetin e Durrësit tashmë prej disa ditësh, edhe pse kompania “Integrated Energy” u shpreh e gatshme që të përpunonte plehrat në landfillin e Sharrës.
Gjithashtu dhe landfilli i Sharrës shprehu gatishmërinë që të përpunojë mbeturinat falas deri më 15 Korrik, ndërkohë që nga Bashkia e Durrësit ende nuk ka një zgjidhje konkrete dhe afatgjatë.
Si për ironi të fatit kryebashkiakja Sako ka publikuar disa pamje nga qyteti ku shprehet se bashkia është 24 orë në shërbim të qytetarëve.
Reagimi i kryebashkiakes vjen pasi, prej ditësh, plehrat në Durrës ende po dekompozohen mbi trotuare dhe brenda kazanëve nën temperatura përvëluese, ndërsa e njëjta situatë ka përfshirë edhe periferinë e qytetit bregdetar. Plehrat janë hedhur nga Bashkia anës rrugëve nëpër fshatra, ku temperaturat e larta rëndojnë situatën, duke shtuar erën e rëndë të mbetjeve. Situata është problematike prej ditësh, teksa jemi në ‘zemër’ të sezonit turistik.
