Një mbledhje urgjente e G7 do të mbahet ditën e sotme për të diskutuar lidhur me situatën në Afganistan dhe faktin se SHBA ndodhet nën presion për të evakuuar sa më shumë afganë. Sipas një marrëveshjeje me talebanët, SHBA duhet të largojë forcat deri më 31 gusht, ndonëse u tha se kjo datë mund të shtyhet.
Sipas “Reuters”, Presidenti Biden do të vendosë brenda 24 orëve të ardhshme nëse do të zgjasë afatin për tërheqjen, ndërsa sot do të diskutohet gjithashtu lidhur me ndihmën humanitare për refugjatët afganë.
Dhjetëra mijëra njerëz janë evakuuar nga Kabuli, por të tjerët që kërkojnë të ikin mbeten pranë aeroportit të qytetit, i cili ruhet nga forcat amerikane dhe aleatët e tyre. Të paktën 20 persona kanë humbur jetën, ndërsa afati i evakuimit po mbaron.
Talebanët kanë thënë se nëse forcat e huaja qëndrojnë përtej fundit të gushtit në Afganistan do të konsiderohej një shkelje dhe paralajmëroi pasoja për Britaninë dhe SHBA-në.
