Situata në veriun e Kosovës ka përjetuar edhe sot një ditë të vrullshme, e kulmuar me vendimin e Listës Serbe për të tërhequr përfaqësuesit e tyre nga institucionet e Prishtinës, duke filluar nga efektivët e policisë.
Ndërkohë, në Beograd, presidenti serb Aleksandar Vucic takoi dy aleatët e saj më të rëndësishëm, përfaqësuesit e Moskës dhe Pekinit.
Vucic takoi fillimisht ambasadorin rus Aleksandar Bocan-Harchenko, me të cilin mësohet se kanë folur specifikisht për situatën në Kosovë.
Presidenti serb ka shprehur shqetësim duke akuzuar Prishtinën për lëvizje të njëanshme, dhe mosrespektim të marrëveshjes së Brukselit.
Raportimet e mediave serbe
Sipas mediave serbe, ndërkohë, ambasadori rus ka deklaruar se Serbia vazhdon të udhëheqë një politikë të përgjegjshme paqeje dhe stabiliteti dhe mbetet e përkushtuar në respektimin e ligjit ndërkombëtar dhe në zbatimin e marrëveshjeve deri më tani”. Takim Vucic ka patur edhe me ambasadoren kineze.
Ndërkohë, reagime diplomatike vijnë edhe nga Brukseli, me saktësisht nga zëvendëssekretari i përgjithshëm i NATO-s, rumuni Mircea Geoana.
Reagimi nga NATO
Me anë të një postimi në Twitter, ai njoftoi se mbi situatën në Kosovë kishte folur me emisarin e Bashkimit Evropian, Miroslav Lajçak, ku paralajmëron se KFOR është e gatshme të ndërhyjë në rast të një përshkallëzimi të dhunshëm.
“Bisedova me Përfaqësuesin Special, Mirsolav Lajçak për situatën e tensionuar në veri të Kosovës. Beogradi dhe Prishtina duhet të përmbahen dhe të parandalojnë përshkallëzimin. NATO- KFOR qëndron vigjilent dhe është gati të ndërhyjë nëse rrezikohet situata”, shkruan Geoana.
Discussion about this post