Emigrimi i vazhdueshëm vitet e fundit ka shkaktuar jo vetëm ndryshime në strukturën e popullsisë. por edhe deformime në tregun e punës. Të dhënat tregojnë se të rinjtë po punojnë më pak dhe vendin e tyre po e zënë të moshuarit.
Në tremujorin e fundit të vitit 2023, që është edhe statistika e fundit zyrtare, ishin të punësuar mbi 253 mijë të rinj, të moshës 15-29 vjeç, ose 21 mijë më pak se në të njëjtën periudhë të vitit 2022.
Hapësirat e lëna bosh nga të rinjtë në tregun e punës, si dhe pensionet e ulëta, po shtyjnë gjithnjë e më shumë pensionistët të punojnë.
Gati 82 mijë persona mbi 64 vjeç ishin në punë në tremujorin e fundit të vitit 2023, ose mbi 27 mijë më shumë pensionistë se në të njëjtën periudhë të vitit 2022.
Puna pas pensionit është e pranishme thuajse në të gjithë sektorët.
Por më masive në bujqësi, si roje pranë bizneseve, apo edhe për profesione të lira të caktuara. Vlen të theksohet, se për shkak të mungesës së fuqisë punëtore, veçanërisht në qarqe të vogla, pensionistët rezultojnë të punësuar edhe në sektorin publik.
Discussion about this post