I dërguari i BE-së për dialogun Kosovë-Serbi, Miroslav Lajçak ka reaguar për situatën e krijuar në veri të Kosovës, me vendosjen e reciprocitetit të targave nga qeveria kosovare.
Lajçak shkruan në Twitter se situata është shqetësuese dhe se është e rëndësishme që të ulen tensionet e krijuara në vend.
“I informova Shefat e Misioneve të BE-së mbi situatën në veriun e Kosovës. Jam i shqetësuar dhe thërras për deeskalim të menjëhershëm. Është e rëndësishme që të ulen tensionet, të rikthehet atmosfera paqësore dhe të lejohet liria e lëvizjes”, shprehet ai.
Ndër të tjera, ai është shprehur se BE është e gatshme për të lehtësuar bisedimet mbi të gjitha çështje e hapura të dialogut.
Ditën e djeshme, qeveria e Kosovës njoftoi se të gjitha automjetet që mbajnë targa të Serbisë dhe hyjnë në Kosovë, duhet të pajisen me targa të përkohshme, që sipas këtij vendimi mund të bëhet në të gjitha pikat kufitare të Kosovës.
Targat duhet të vendosen në vende të dukshme dhe për vendosjen e tyre do të ketë një pagesë prej 5 eurosh, ndërsa shkruhet gjithashtu se vlefshmëria e targave zgjat 60 ditë.
