Ministria e Punëve të Brendshme në Kosovë ka bërë të ditur se që nga e hëna kur u vendos reciprociteti me Serbinë sa i përket targave të automjeteve e deri më sot, ka administruar mbi 6 mijë targa të përkohshme.
Sipas njoftimit zyrtar, janë administruar gjithsej 6375 targa të përkohshme në të gjitha Pikat e Kalimit Kufitar (PPK) dhe Qendrat e Regjistrimit të Automjeteve në mbarë territorin e Republikës së Kosovës.
Sipas statistikave nga MPB, në pikën kufitare Dheu i Bardhë janë lëshuar 1,616 targa të përkohshme, në Merdar 1309, në Jarinjë 13, në Bërnjak 11 e kështu me radhë. Kujtojmë se policia e Kosovës po vazhdon të qëndrojë në pikat kufitare 1 dhe 31 në Jarinjë dhe Bërnjakë, pasi qytetarët serbë edhe sot po vazhdojnë të mbajnë të bllokuara rrugët në këto pika.
Autoritetet e Kosovës, të hënën kanë nisur zbatimin e vendimit të qeverisë për masën e reciprocitetit për veturat me targa të Serbisë që hyjnë në Kosovë.
Sipas këtij vendimi, të gjitha automjetet me targa të Serbisë duhet të pajisen me targa të përkohshme, të lëshuara nga autoritetet e Kosovës dhe që kushtojnë 5 euro.
Kryeministri i Kosovës, Albin Kurti ka thënë të mërkurën se Prishtina dhe Beogradi duhet t’i heqin plotësisht targat e përkohshme për të zgjidhur situatën e krijuar, ose do t’i mbajnë të dyja.
