Situata problematike e shkaktuar nga flakët një ditë më parë në Shëngjin raportohet se është stabilizuar, ndërsa disa vatra zjarri vijojnë ende aktive në vend. Problematike situata vlerësohet në zonën mbi qytetin e Tepelenës, ku sipas autoriteteve, flakët kanë dalë jashtë kontrollit.
Emergjencat Civile bëjnë me dije se në fshatin Mal Shëngjin, situata paraqitet më e stabilizuar.
Veç ndërhyrjes së helikopterit Cougar nga ajri, në mbështetje erdhën edhe dy avionët Canadair nga Italia, pjesë e ndihmës nga Mekanizmi Evropian i Mbrojtjes Civile. Nga flakët nuk pati lëndime në njerëz, por u shkaktua dëme në biznese përreth zonës së zjarrit, u dogjën 2 bare plazhi dhe çatia e një shtëpie.
“Aktualisht është arritur izolimi i plotë i vatrave dhe po vijon operacioni për shuarjen përfundimtare të tij nga shërbimet zjarrfikëse, efektivët e FA, policisë, strukturat vendore të mbështetura edhe nga 2 avionët Canadair të Italisë”, konfirmojnë Emergjencat Civile.
Të njëjtat burime shtojnë se vijon puna për shuarjen e zjarrit në fshatin Zavalinë – bashkia Elbasan, për të cilin janë angazhuar ditën e sotme strukturat e pushtetit vendor të mbështetura nga FA.
Aktive janë vatrat e zjarrit dhe në Kodrat e liqenit të Viroit, bashkia Gjirokastër si dhe zjarri mbi qytetin e Tepelenës, i cili ditën e sotme si pasojë e erës së fortë ka dalë jashtë kontrollit, thuhet në njoftimin e emergjencave.
Janë angazhuar ditën e sotme për normalizimin e situatës strukturat vendore të mbështetura nga Forcat e Armatosura dhe një helikopter i FA.
“Po punohet në fshatin Lozhan-Bode, bashkia Maliq, në fshatin Picar, bashkia Vorë në një objekt tregtar, në fshatin Ujanik, bashkia Skrapar. Ndërsa situata në qarqet e tjera paraqitet relativisht e qetë”, mbyllet njoftimi.
Lexo edhe:
Zjarri në Shëngjin, Gjekmarkaj: Vura alarmin, por shkoi në vesh të shurdhër
Discussion about this post