Një shembje masive dherash dhe shkëmbinjsh bllokuan totalisht aksin rrugor Qukës-Qafë Plloçë, dy muaj pas inaugurimit. Shembja ka ndodhur në afërsi të tuneleve duke e bërë këtë aks rrugor të pakalueshëm për automjetet.
Aksi Qukës-Qafë Pllocë kushtoi rreth 260 milionë euro dhe përfundoi pas 14 vitesh, por mjaftuan vetëm dy muaj përdorim që rruga të dalë jashtë funksioni. Shembjet masive tregojnë se cilësia e punimeve është mjaft e dobët dhe në terren kanë munguar studimet e mirëfillta gjeologjike mbi qëndrueshmërinë e tokës.
Shembjet e përsëritura ngrenë dyshime të forta për mënyrën e projektimit të rrugës, për mbikëqyrjen dhe cilësinë e ndërtimit. Rruga që u trumbetua si një investim strategjik që do të lidhte Perëndimin me Lindjen po kthehet në shembull të keqmenaxhimit të fondeve publike për ndërtimin e saj.
Edhe rruga Korçë-Ersekë ka filluar të shfaqë sërish problematika. Pas reshjeve të shiut që ranë ditët e fundit janë evidentuar plasaritje të mëdha në këtë aks rrugor.
Dëmtimet kanë ndodhur pikërisht në vendin ku një vit më parë pati rrëshqitje toke.
Aktualisht aksi është i qarkullueshëm ndërsa nuk dihet nëse plasaritja do të shkojë edhe më tej në strukturë. Pas ndërtimit të rrugës çështja është në hetim nga SPAK.
gijotina.com/
Discussion about this post