Deputetja e LSI, Erisa Xhixho ka reaguar lidhur me nisjen e vitit të ri shkollor, ku akuzon qeverinë se ndonëse e konsideron arsimin si prioritet ndërkombëtar, në programin që miratoi në Kuvend, nuk kishte asnjë buxhet dedikuar arsimit.
“Nis sot dita e parë e shkollës për arsimin parauniversitar, që trumbetohet të jetë një prioritet kombëtar, por vetëm si i tillë nuk trajtohet. Fatkeqësisht kjo qeveri tregon me fakte se nuk e ka prioritet edukimin, për sa kohë në programin që sapo miratoi në Kuvend nuk kishte asnjë fjalë për buxhetin e dedikuar për arsimin, që sot është më i vogli në rajon me 2,4 % të GDP, kur duhet të ishte minimalisht 5% e GDP, për të rritur cilësinë dhe garantuar punësim të sigurt”.
Xhixho shkruan në Facebook se shkollat po mbyllen, ndërsa mësuesit paguhen më pak se në vendet e tjera të rajonit.
“Këtë vit, shkollat presin 10 mijë fëmijë më pak në klasën e parë se një vit më parë, ndërkohë që shumë shkolla mbyllen në Elbasan, Shkodër etj., dhe 350 mësues rrezikojnë vendin e punës për mosplotësim të orëve sipas planit. Sipas Eurostat mësuesit tanë paguhen mesatarisht 20-50% më pak se në vendet e tjera të rajonit, duke mos iu njohur financiarisht puna e palodhur në kushtet sfiduese të pandemisë”.
Sipas deputetes së LSI, si pasojë e Covid, shumë nxënës kanë humbur mundësinë për të përfituar njohur, ndërsa shkruan se këtë vit do vijohet sërish me mësim me turne dhe orare të reduktuara.
“Shumë nxënës nuk kanë pasur qasje në internet gjate pandemisë dhe nuk kanë pasur platforma efikase të të mësuarit online. Për rrjedhojë, më shumë se 60% e nxënësve kanë humbur mundësitë për të përfituar njohuritë sipas programeve dhe kurrikulave mësimore. Ndërkohë që grumbullimet vazhdojnë normalisht , këtë vit do vijohet me mësimin me turne ,orë të reduktuara që nuk siguron cilësinë e mësimit dhe shkakton lodhje për nxënësit dhe mësuesit. Në kushtet kur mësuesit janë të vaksinuar ose kanë test pcr dhe nxënësit kanë detyrimin e mbajtjes së maskës dhe respektimin e rregullave të pandemisë”.
Ndër të tjera, deputetja shkruan se edukimi i të rinjve është investimi më i madh që bën në emër të së ardhmes, ndërsa ka propozuar disa politika konkrete për rritjen e buxhetit të arsimit dhe të cilësisë sipas LSI.
