Nga Andi Bushati
Në titujt e shtypit është rishfaqur sërish një lajm sensacional, që bën zhurmë dhe zhduket herë pas here, ai se ish bosi i Agon Channel, Francesko Becchetti, ka fituar një shkallë tjetër gjykimi ndaj qeverisë Rama, duke e detyruar shtetin shqiptar të paguajë plot 110 milionë euro (pa kamatë vonesat dhe shpenzimet avokatore) për mbylljen arbitare të kësaj mediaje. Nisur nga fakti se Edi Rama dhe Belinda Balluku reken ti trajtojnë shqiptarët si idiotë, duke thënë se kjo është një vepër e opozitës, që e përdor këtë histori për fushatë, ose duke anatemuar ata që i gëzohen marrjes së “parave tona” nga një kriminel, kjo çështje ia vlen të shpjegohet shkurtimisht.
Së pari, vendimi është marrë nga Gjykata e arbitrazhit të Bankës Botërore (ICSID), në fund të muajit të shkuar dhe askush nuk mund të imagjinojë gomarllëqet e kryeministrit se ajo është ndikuar nga fushta elektorale. Së dyti, ky nuk është një vendim i ri, pasi Shqipëria është dënuar më këtë “gjobë” që në prill të vitit 2019.
Thjeshtë, këtë radhë, gjykata nuk ka marrë parasysh ankimimin e studios avokatore të Ramës, të përfaqësuar nga gruaja e Tony Blair, që shteti ynë të mos i shlyejë pagesën ish investitorit kontrovers italian, pasi ai është dënuar nga drejtësia shqiptare, për krimin e pastrimit të parave. Pra, ICSID, nuk ka ndëshkuar vetëm vendimet arbitrare të qeverisë, por ka injoruar edhe vendimet e drejtësisë sonë të reformuar, plot kimete, nga amerikanët dhe evropianët.
Ky është sfondi i çështjes, por më i rëndësishëm se ky sqarim në formë, që bëhet i nevojshëm nga përpjekja për të debilizuar debatin publik, është të kthjellohet thelbi i saj.
Edhe kryeministri edhe kundërshtarët e tij, po e vënë theksin tek fakti nëse buxheti i shtetit do ti paguajë ose jo, Francesco Becchettit, shumën që i detyrohet për mbylljen e paligjshme të televizionit të tij. Rama gafurret në studio televizive, me arrogancën e një beu fshati, se ai do ti marrë “noc rrokun” paratë. Opozitarët këmbëngulin se ato miliona tashmë kanë firuar, duke e fajësuar shefin e qeverisë për vendime në kundërshtim me ligjin. Të dyja palët, ose nga perversiteti ose nga naiviteti, harrojnë të lexojnë vendimin e marrë nga Gjykata e arbitrazhit të Bankës Botërore. Pikërisht aty fshihet skandali.
Na fakt, sado e madhe të jetë kjo “gjobë”, shuma e saj nuk është ana më e errët e kësaj historie. Më e rënda qëndron në faktin se gjoba po paguhet pasi qeveria Rama ka mbyllur politikisht një media. Në vendimin përfundimtar të ICSID gjenden tre elementë që na tregojnë se si asgjesohet një televizion që nuk i pëlqen regjimit të Ramës. Nisur nga provat që ka paraqitur pala e cënuar, Gjykata e arbitrazhit ka vendosur se qeveria e ka shantazhuar Agon Channel, si me mesazhet e Erion Veliajt: “po më bën armik”, po ashtu edhe me këshillat e Engjëll Agaçit për të zbutur tonet kritike. Më tej akoma, gjykata ka konstatuar se si varmihës të një televizioni konkurent kanë shërbyer edhe ekranet e mëdha kombëtare, servise të Edi Ramës. Mjafton të hapësh arkivat për të parë si e kanë raportuar këtë ngjarje, në 2015, TV Klan dhe Top Channel, për tu bindur për këtë. Dhe së fundi, Becchetti është shpërblyer nga ICSID me 110 milinë euro, pasi në këtë vend prokuroria, gjykatat dhe policia nuk vepronin sipas ligjit, por sipas urdhërit politik.
Pra historia e eleminimit të Agon Channel është një vrasje në bashkëpunim mes qeverisë, pushtetit të drejtësisë dhe atij mediatik. Në këtë rast ato nuk kanë vepruar sipas parimeve të kontrollit dhe balancimit të njëri-tjetrit, sikurse duhet të ndodhë në një demokraci, por si leva të një regjimi autokratik.
Pavarësisht sa personazh i bardhë apo i zi të ishte italiani Becchetti, perandorisë së tij mediatike me Sabrina Ferillin, Fatos Lubonjën, Simona Venturën, Andi Bejten, Pupon, Sonila Meçon dhe Adi Krastën, iu vu dryni dhe iu ndërpre transmetimi me urdhër të një njeriu. Kjo është ana e rëndë e këtij skandali që nxori në pah vendimi i një gjykate me reputacion. Para kësaj, shuma që do të zhvatet nga taksat e shqiptarëve për të shkuar në xhepat e një italiani ka më pak vlerë. Sepse shumëkush sot mund të qe dakord që ti humbnim ato 110 milionë euro për të pasur një TV që nuk i lëpihet Edi Ramës.
Discussion about this post