Zbulohet përse Jorgo Goro nuk jep dorëheqje nga posti i kryetarit të Bashkisë Himarë. Nuk ikën Jorgo pa “rregulluar” varrezat e Himarës. Mos po kërkon që përvetësimin e fundit të fondeve t’a bëjë në emër të të vdekurve? Epo, ndërsa flitet për largimin tij si kryetari në detyrë i Bashkisë Himarë, Goro vazhdon pazaret me tenderët.
Më datë 21 dhjetor 2023, kryetari ka firmosur një tender me numër reference REF-79224-09-07-2023 dhe objekt “Rikonstruksionin e rrugës dhe sheshit të varrezave të reja në Himarë”. Në garë për këtë shërbim kanë qenë 5 kompani, por 4 prej tyre janë skualifikuar nga komisioni i vlerësimit të ofertave, me argumentin se rezultojnë të angazhuara në kontrata të tjera. Edhe pse ato kontrata janë drejtë përfundimit, Goro nuk i fali, por i skualifikoi. Në lojë janë 250 milionë lekë, prandaj Goro e ka paracaktuar cili do t’a marrë fondin.
Kështu, duke mbetur i vetmi në garë (me ofertën më të shtrenjtë) fitues është shpallur bashkimi i kompanive “IMPLEX” shpk dhe “KOLA INVEST ” shpk. Për pasojë, Open Data Albania i ka vendosur prokurimit “Flamur të kuq”, duke ngritur kështu dyshimet se fituesi ka qenë i paracaktuar, pasi është eliminuar konkurrenca.
330 mln lekë për mirëmbajtje
Ndërkohë, sikur përmendëm më sipër, Goro duket se i ka kthyer varrezat në shesh korrupsioni dhe shpërdorimi të fondeve. Kujtojmë se më datë 1 dhjetor 2023, Goro mbylli një tjetër tender me vlerë 330 milionë lekë, pa garë, për mirëmbajtjen e varrezave dhe lulishteve pranë tyre.
Bëhet fjalë për tenderin me objekt “Mirëmbajte e gjelbërimit në hapësirat publike dhe varrezat”, me afat kohor 24 muaj. Sipas dokumenteve firma fituese do të merret me vaditjen e pemëve, shkulje bari dhe shkurresh, krasitje pemësh dhe për këto shërbime do të paguhet 330 milionë lekë. Edhe këtë tender Goro e ka dhënë pa garë. Theksojmë se firma fituese ALKO IMPEX CONSTRUCTION është në pronësi të Arbër Abazit, nipit të ish-deputetit të PS-së Sadri Abazi.
Bashkia Himare ka në territorin e saj një sipërfaqe 120000 m2 varreza publike të cilat janë të vendosura në çdo fshat. Banorët dhe më tepër komunitetet fetare i mirëmbajnë varrezat, por Goro ka vendosur t’u japë një dorë me këtë prokurim. Njësoj do të ndodh edhe me varrezat e reja, do përdoren si justifikim për vjelje fondesh, por do të jenë qytetarët vetë ata që do t’i mirëmbajnë. Pra, Goro varrosi 580 milionë lekë në varreza me këto dy tendera.
Goro nuk i shqitet Himarës…
Jorgo Goro edhe pse pas zgjedhjeve të majit duhej të ishte larguar nga drejtimi i Bashkisë së Himarës, vijon ende të jetë në krye të saj për shkak të ngërçit që është krijuar për betimin e kryebashkiakut të ri. Si duket, Goro po shfrytëzon çdo ditë të mundshme në drejtim të Bashkisë për të ndarë fondet tek mitë e tij me tendera pa garë, pra duke shpërdoruar detyrën.
Kujtojmë se pak ditë më parë u fol se Goro tha dorëheqjen. Kryeministri Rama e paralajmëroi në një farë mënyrë largimin e tij dhe foli për zgjedhje të reja në këtë bashki.
“Referimi nga ana e GJKKO e ngërçit që krijohet në vazhdimësinë e përkohshme të detyrës nga ana e kandidatit humbës, përderisa faktikisht kryebashkiaku i zgjedhur mbetet në paraburgim, ndërkohë që kryebashkiaku ende në zyrë nuk e ka legjitimitetin për të drejtuar bashkinë në mungesë të fituesit, e bën qartësisht të lexueshme dhe lehtësisht të kuptueshme nevojën e daljes nga ky ngërç,” deklaroi Rama.
Por, pas tij reagoi vetë Goro dhe deklaroi se nuk ka dhënë dorëheqjen si kryetari në detyrë i Bashkisë Himarë. Bashkia Himarë është kthyer në një mollë sherri mes Shqipërisë dhe Greqisë. Arrestimi kandidatit Fredi Beleri me akuzën për blerje të votave solli përplasjen në marrëdhëniet mes dy vendeve, që kulmoi me bllokimin e hapjes së negociatave me Shqipërinë për kapitujt e parë të anëtarësimit në BE. Duke parë veprimet e Goros, duket se përplasja ia paska vlejtur për të përfituar ca tendera më shumë!
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016
Discussion about this post