Ndërsa inflacioni për janarin shënoi një rritje modeste prej 1.9%, çmimet e ushqimeve vijojnë të rriten në një ritëm më të lartë, duke rënduar gjithnjë e më shumë xhepat e qytetarëve.
Të dhënat nga INSTAT tregojnë se ndryshimi vjetor i indeksit të çmimeve të konsumit është ulur krahasuar me një vit më parë, kur ky tregues ishte 3.4%. Megjithatë, grupi i ushqimeve dhe pijeve joalkoolike, që përbën një pjesë të madhe të shpenzimeve të familjeve shqiptare, ka shënuar një rritje prej 2.6%.
Përveç ushqimeve, janë regjistruar rritje të ndjeshme edhe në kategori të tjera si argëtimi dhe kultura, pijet alkoolike dhe duhani, pajisjet shtëpiake dhe veshjet, me një rritje që varion nga 3.3% deri në 5.7%.
Ajo që shqetëson më shumë është fakti se nga 41 produktet kryesore të konsumit në vend, 29 prej tyre kanë pësuar rritje të çmimeve. Ndër produktet me rritjen më të madhe janë mishi (+4.0%), qumështi, djathi dhe vezët (+3.3%), zarzavatet (+3.0%) dhe peshku (+2.0%).
Ekspertët e lidhin këtë rritje të vazhdueshme me krizën në sektorin e bujqësisë, ku rënia e numrit të bagëtive dhe ulja e prodhimit vendas po sjellin mungesa në treg dhe rritje të çmimeve.
Përveç rritjes vjetore, qytetarët janë përballur edhe me shtrenjtim të menjëhershëm nga dhjetori në janar, ku sipas INSTAT, çmimet e ushqimeve të shportës janë rritur me 0.9%.
Në një kohë kur pagat nuk po pësojnë rritje të ndjeshme dhe fuqia blerëse mbetet e dobët, rritja e vazhdueshme e çmimeve është kthyer në një shqetësim serioz për familjet shqiptare. Pyetja që ngrihet është: Deri kur do të vazhdojë kjo tendencë dhe çfarë masash do të ndërmerren për të frenuar këtë valë të rritjes së çmimeve?
Discussion about this post