Ndryshon rregullorja e shitjes së energjisë elektrike nga OSHEE. Para disa ditësh qeveria shpalli emergjencën energjetike, ku ndau 200 milionë euro për të përballuar blerjen e energjisë elektrike.
Në analizën e krizës, edhe vetë kryeministri u detyrua të pranojë se energjia shitet lirë dhe blihet shtrenjtë, por u justifikua me faktin se jemi një shtet i varur vetëm nga energjia hidrike.
Me rregulloren e re që do të hyjë në fuqi në datë 1 dhjetor të këtij viti, i jepet mundësia korporatës të shesë në treg bazuar në platformën online.
Vendimi është marrë nga Enti Rregullator i Energjisë (ERE), duke i lënë kohë shoqërisë publike të furnizuesit publik, të realizojë ndryshimet e nevojshme në platformën IT online të blerjes së energjisë elektrike, me qëllim përdorimin e kësaj platforme edhe në procedurat e shitjes së tepricave të energjisë elektrike në tregun e parregulluar.
Aktiviteti tregtar i FTL (Furnizuesi i Tregut të Lirë) bazohet në një vendim të para disa muajve, që u mor nga Enti Rregullator i Energjisë, i cili kushtëzoi nisjen e shitjes së tepricave të energjisë në tregun e parregulluar, duke u bazuar në rregulloren që përdoret nga Korporata Elektroenergjetike Shqiptare.
Ndërkohë që, ndonëse aktualisht kjo shoqëri është duke blerë energji nga importi për shkak mungesës së prodhimit, aktiviteti tregtar nuk ka munguar, duke qenë se gjatë muajit prill dhe maj përmes proceduarve të shitjes u siguruan rreth 4.3 mln euro.
Në total, për periudhën 24 prill deri 21 maj, u shitën 77.600 Mwh energji me çmim mesatar prej 56.5 euro/ Mwh. Pra, një diferencë rreth 150 deri në 200 euro me vlerën e blerjes së energjisë nga importi. Ky është një skandal që nuk ka logjikë që t’a justifikojë.
Referuar legjislacionit në fuqi, shoqëria publike e Furnizimit në Tregut e Lirë ka detyrimin për blerjen e energjisë elektrike nga burimet e rinovueshme të energjisë. Fillimisht, kjo energji tregtohet për mbulimin e humbjeve të Operatorit të Sistemit të Shpërndarjes me të njëjtin çmim me të cilin e blen këtë energji nga prodhuesit me përparësi të energjisë elektrike. Ndërkohë që, në rast të tepricave të krijuara ato tregtohen në treg të parregulluar me çmimin që ofron ky treg.
Ditët e fundit është konstatuar një rritje marramendëse e çmimeve të blerjes në tenderat e zhvilluara për blerjen e energjisë që janë gjithnjë më shtrenjtë se sa në bursën hungareze të energjisë HUPX, tek e cila referohen çmimet për rajonin e Ballkanit.
