Sistemi shëndetësor në Shqipëri vazhdon të jetë në gjendje skandaloze me godian spitalesh të rrënuara, mungesë medikamentesh dhe shërbimesh, teksa bluzat e bardha vazhdojnë të largohen nga vendi dhe pacientët përballen me arrogancë.
Së fundmi, një qytetar ka denoncuar për “JOQ” gjendjen alarmante të pavijonit të pneumologjisë për fëmijë në Tiranë. Sipas tij, kushtet në të cilat trajtohen fëmijët e sëmurë janë skandaloze dhe të rrezikshme për shëndetin e tyre.
Në videon e dërguar nga qytetari, shihen qartë muret e mbuluara me myk në dhomat ku shtrohen fëmijët me probleme pulmonare. Një situatë e paimagjinueshme për një institucion shëndetësor që supozohet të ofrojë trajtim dhe përkujdesje, por që në realitet duket se përbën vetë një rrezik për të vegjlit.
Prindërit, ndonëse të ndërgjegjshëm për rrezikun, detyrohen të qëndrojnë aty për shkak të nevojës urgjente për trajtim të fëmijëve të tyre. Kjo është një tjetër dëshmi e degradimit të sistemit shëndetësor në vend dhe e mungesës totale të vëmendjes nga institucionet përgjegjëse.
Mesazhi i qytetarit
“Dua të bëj një denoncim për gjendjen kritike që është pavioni i pneumologjisë për fëmijë në Tiranë. Është skandaloze dhe e paimagjinueshme që fëmijë me probleme me mushkëritë duhet të shtrohen për trajtim në një dhomë të mbuluar me myk. Është e tmerrshme. Dhe kështu ishin të gjitha dhomat. Prindërit që rrinin nga e keqja sepse duhet të bënin terapinë për fëmijët e sëmurë.”
Discussion about this post