Reshjet e shiut të ditëve të fundit kanë sjellë problematikat e para në sistemin e ujit të pijshëm. Drejtoria e Ujësjellës Kanalizime në Fier u ka bërë thirrje banorëve të zonës që të ndalojnë konsumin e ujit të çezmës, pasi në të ka përmbajtje të lartë mikrobike.
Instituti i Shëndetit Publik ka marrë disa mostra në disa prej puseve të furnizimit në qytet dhe pas analizave të kryera, ka rezultuar se ka një prezencë të lartë ngarkese mikrobike në ujë dhe për këtë arsye nuk mund të konsumohet për tu pirë, por vetëm për përdorim sanitar.
“Nga përgjigjet paraprake të mostrave të ujit të analizuara nga Instituti i Shëndetit Publik, të 9 mostrat në puset që furnizojë me ujë të pijshëm Bashkinë Fier, rezultojnë ngarkesë mikrobike dhe janë jo konform Standartit Shtetëror, Për Miratimin e Rregullores “Cilësia e ujit të pijshëm”. Për këtë arsye uji nuk rekomandohet për t’u konsumuar, ai mund të përdoret vetëm për përdorim sanitar (komunal) deri në një përgjigje të dyte nga ISHP”, njofton Ujësjellësi Fier.
Shkak për situatën e krijuar sipas Drejtorisë së Ujësjellësit janë bërë përmbytjet e fundit që janë regjistruar në këtë qark pas shirave të rrëmbyer që përfshinë vendin tonë javën që sapo lamë pas.
Discussion about this post