Partia Demokratike ka reaguar pas publikimit të skandalit me të dhënat private, përfshirë pagën që qytetarët marrin, qoftë në sektorin publik, apo në atë privat.
Përmes një deklarate për shtyp, nënkryetari i PD-së Enkelejd Alibeaj e konsideruar publikimin e të dhënave sensitive një skandal me përmasa të jashtëzakonshme, duke e krahasuar me skandalin e patronazhistëve më 25 prill.
“Qeveria e Edi Ramës ka dështuar plotësisht të mbrojë të dhënat personale dhe sensitive për pagat, numrin personal të identifikimit, vendin e punës të mbi 630 mijë qytetarëve. Partia Demokratike beson se publikimi i të dhënave për pagat e mbi 630 mijë qytetarëve është pjesë e të njëjtës skemë patronazhimit të përdorur nga Partia Socialiste për blerjen e zgjedhjeve. Të gjithë e dimë, se pak javë para zgjedhjeve, të dhënat personale të më shumë se 900 mijë qytetarëve, të cilat disponohen vetëm nga qeveria, u keqpërdorën nga kreu i qeverisë Edi Rama për të blerë mandatin e tij të tretë”, tha Aliebaj.
Alibeaj ka kërkuar dorëheqjen e kryeministrit, pasi sipas tij publikimi i pagave të mbi 630 mijë qytetarëve është pjesë e skemës së patronazhimit për blerjen e zgjedhjeve.
“Sot çdo qytetar i Republikës së Shqipërisë duhet t’i kërkojë Edi Ramës të japë dorëheqjen. Të dhënat e tyre personale, paga e tyre ka rënë në duart e keqbërësve dhe për këtë përgjegjës është vetëm Edi Rama me etjen e pangopur për pushtet. Edi Rama duhet të mbajë përgjegjësi për këtë skandal të përmasave të jashtëzakonshme! Si mbrojtësi dhe frymëzuesi kryesor i skemës së paligjshme të patronazhimit për blerjen e pushtetit, qeveria e tij ka ekspozuar ndaj kujtdo të dhënat e qytetarëve, përfshi pagën dhe vendin e tyre të punës”, deklaroi ai.
Më herët, prokuroria e Tiranës ka nisur verifikimin për databazën me të dhëna të qytetarëve të punësuar në sektorin privat dhe publik.
Discussion about this post