Mirlinda Karçanaj nuk ka dhënë dorëheqjen nga drejtimi i Agjencisë Kombëtare të Shoqërisë së Informacionit, edhe pse është arrestuar dhe vendosur në masën “arrest shtëpie” nga SPAK, nën dyshimin se është pjesë e një grupi të strukturuar kriminal që përdorte pengmarrje, presion dhe forma të tjera për të abuzuar me tenderat e AKSHI-t.
Ndërkohë që përballet me tre akuza nga Prokuroria e Posaçme, për shkelje të barazisë në tendera dhe veprime në kuadër të grupit të strukturuar kriminal, Karçanaj nuk e ka lëshuar postin, por ka deleguar kompetencat e drejtimit të institucionit te Romina Kostani, sipas dokumentit zyrtar.
Vendimi rezulton të jetë marrë pasi Gjykata e Posaçme konfirmoi masën e sigurisë “arrest shtëpie”, si pjesë e një hetimi të gjerë të SPAK, në kuadër të të cilit u vendosën masa sigurie për tetë persona, mes tyre dy drejtuese të AKSHI-t, nënkryetarin e Policisë së Tiranës dhe disa biznesmenë.
Ergys Agasi është një nga dy biznesmenët e shpallur në kërkim, i akuzuar nga SPAK si pjesë e grupit kriminal që manipulonte tenderat e AKSHI-t, jo vetëm përmes dokumenteve, por edhe përmes dhunës. Avokati i tij, Maks Haxhia, pranoi se Agasi nuk ndodhet aktualisht në Shqipëri, por shtoi se ai do të rikthehet për t’u përballur me akuzat e Prokurorisë së Posaçme.
Në lidhje verërat luksoze me vlerë gati 3 milionë euro dhe dyshimet se Agasi ka përfituar nga tenderat e AKSHI-t, avokati Haxhia tha se çështja po përdoret politikisht.
Ndërsa SPAK dyshon se Ergys Agasi qëndron pas pengmarrjes së biznesmenit Gerond Meçe, biznesmeni, përmes avokatit të tij, pretendoi se nuk e njeh personin në fjalë.
Sa i përket pamjeve nga kamerat e sigurisë, që sipas hetimit kanë fiksuar pazare për tendera mes Agasit, drejtueses së AKSHI-t dhe biznesmenit Ermal Beqiri, avokati dha këtë argument.
Ergys Agasi dhe Ermal Beqiri dyshohen se janë në krye të grupit të strukturuar kriminal që, me ndihmën e drejtores së AKSHI-t, Mirlinda Karçanaj, kanë përfituar tendera me vlerë miliona euro.
Discussion about this post