Kjo pritë që ndan në mes lumin Shkumbin duke e devijuar tërësisht shtratin e tij është masakra e radhës që iu bëhet burimeve ujore në vendin tonë.
Ka rreth një muaj që kompania private RE&AL shpk. ka ndërtuar një pritë në formë ure përgjatë lumit Shkumbin. Firma ka dërguar në zonë edhe skrepat për të shfrytëzuar inertet duke e tjetërsuar shtratin e lumit, shkruan “Ballkan web”.
Ndërtimi i kësaj prite mbi lumin, pikërisht në fshatin Grifshkë, ku kalojnë mjetet e firmës private dhe shfrytëzojnë gurët e lumit, ka penguar rrjedhën natyrale të tij, duke rrezikuar edhe përmbytjen e tokave bujqësore e shtëpive të banorëve që ndodhen në të dyja brigjet e lumit.
Pas denoncimeve të banorëve te zonës, ditë më parë policia e Elbasanit arrestoi në flagrancë një nga pronarët e firmës, 65-vjeçarin Edmond Malkja, ndërsa tjetri, Dylejmen Zeka, 60-vjeç u procedua penalisht.
Akuzat e ngritura për ta ishin për veprën penale shfrytëzim në mënyrë të paligjshme të inerteve duke penguar rrjedhjen natyrale të ujit në lumin Shkumbin. Por edhe pas veprimeve ligjore të ndërmarra për pronarët firma RE&AL shpk, puna në lumin Shkumbin ka vijuar përgjatë çdo nate. Ndërkaq banorët jashtë kamerave, thonë se janë kërcënuar të mos ngrenë sërish zërin dhe të mos denoncojnë rastin.
