Një situatë skandaloze ka përfshirë QSUT në Tiranë për të sëmurët me leucemi. Prej disa kohësh, në shërbimin e hematologjisë, ku janë të shtruar pacientët me sëmundje të gjakut mungojnë medikamente të rëndësishme që shërbejnë për kimioterapi. Ilaçi që mungon konsiderohet si një nga më të rëndësishmit për të sëmurët me lecuemi, ku një flakon kushton 1550 euro.
Burimet nga spitali thanë për Gijotina.com se ky ilaç ndodhet në farmacinë e spitalit, por jepet në mënyrë selektive dhe pacientëve nuk u sigurohet sasia e nevojshme. Mjekët shpjegojnë se medikamentet në fjalë nuk u jepen pacientëve në kohën e duhur, ose në sasinë e duhur dhe kjo shkakton më shumë dëmtime sesa u vjen në ndihmë atyre.
Ndërkohë, kjo nuk është hera e parë që QSUT, e cila harxhon miliona USD për shërbime të ndryshme dytësore përballet me situata të tilla për të sëmurët me leucemi. Edhe dy vite më parë, e njëjta situatë është denoncuar në QSUT, për medikamentet kryesore për trajtimin e leucemisë. Po ashtu, në vitin 2016, PD denoncoi se tre muaj me radhë mungonte ilaçi për fëmijët me leucemi.
