Pas publikimit të dhënave tona dhe dokumenteve që qarkullojnë në duart e hakerave, tashmë qeveria jonë po kërkon të fusë në këtë vorbull skandalesh edhe fëmijët. Të marrësh të dhëna private në rrugë jo normale dhe të publikosh të dhënat e qytetarëve është cenim i sigurisë dhe na tregon se qeveria jonë nuk i ndahet kontrollit total të qytetarëve dhe profesionit të “spiunazhit”. Prej disa kohësh po diskutohet publikimi i të dhënave për mijëra qytetarë që rrodhën na patronazhistët. Qeveria jo vetëm që nuk mbajti përgjegjësi, por vazhdon të zgjerojë rrjetin e vjedhjes dhe dërgimit të të dhënave në duar SPAK të sigurta dhe që përbëjnë rrezik për secilin prej nesh. Një presion i tillë tashmë po iu bëhet edhe fëmijëve.
Ka qenë analisti Vehap Kola, i cili ka ngritur shqetësimin për një skandal që ka përfshirë shkollat në të gjithë vendin. Përmes një postimi në Facebook ai ka publikuar një letër, e cila, sipas tij, i është dërguar të gjithë prindërve që kanë fëmijët në shkolla. Përmes kësaj letre prindërit lajmërohen se fëmija e tyre “do të merret në pyetje” për disa të dhëna. Po pa përcaktuar se në lidhje me çfarë do të pyeten fëmijët e tyre. Ky shtet po shkel edhe më ligjin për privatësinë ku në letër prindërve iu thuhet që, në rast se ata nuk dërgojnë një letër ku të shprehin se nuk janë dakord që fëmijës t’i merren këto të dhëna, ISHP e merr heshtjen si aprovim.
“Kemi nevojë urgjente për një lëvizje shoqërore që na mbron nga shteti total. Kjo letër u është dërguar dje qindra prindërve që kanë fëmijët në shkolla publike në Shqipëri. Informon prindërit që fëmijët e tyre do të maten, peshohen dhe “t’u bëhen ca pyetje”. Se çfarë pyetjesh, e di Partia. Prindi nuk ka pse shqetësohet. Sikur të mos mjaftojë kjo, prindit i kërkohet që nëse nuk është dakord, të dërgojë një letër ku shprehet se nuk dëshiron që të merren të dhënat e fëmijës. Përndryshe, ISHP dhe OBSH do ta marrin heshtjen si miratim”, tregon analisti.
Më tutje analisti shpjegon se në asnjë vend të botës nuk funksionin kështu. Por, nëse prindi nuk jep aprovimin asnjë institucion nuk ka të drejtë të marrë të dhënat e fëmijëve. Duke shtuar këtu faktin që, prindërit nuk kanë se si t’i besojnë një institucioni si ISHP, i cili gjatë pandemisë është përgjegjësi që fëmijë dhe shumë të rinj humbën jetën.
“Në një shoqëri normale, gjasme demokratike siç jemi ne, do të duhej të funksiononte logjika e kundërt: nëse prindi nuk ka dhënë pëlqim me shkrim, ISHP dhe OBSH nuk do të mund të merrnin të dhënat e fëmijës. Gjithë bota njeh konceptin e Consent Form [Formularit të Aprovimit], këta e bëjnë fakt të kryer. Jo vetëm kaq, por prindit i japin mundësinë që të kundërshtojë me shkrim, nëse është kundër. Pra, të drejtat e njeriut me kokë poshtë. Dhe kujt t’i besoj?! ISHP-së së pandemisë që bëri propagandë për interes të qeverisë dhe la të vdisnin njerëzit bodrumeve të spitaleve, pa aspirim, pa ilaçe, pa shërbim, pa komunikim me familjarët. Unë e shoh se e gjithë klasa jonë politike është duke punuar me pasion për interesat e saj të ulëta dhe është gati të bëjë kurban çdo të drejtë njerëzore dhe çdo hapësirë lirie për qytetarët e këtij vendi. Por nuk kam ndërmend të hesht më”, shprehet analisti. E pra kjo letër nuk jep asnjë siguri se për çfarë do të pyeten nxënësit minoren dhe nuk jep asnjë garanci, që këto “deklaratat” të tyre do ruhen të sigurta.
Prindërit nën “presion”
E pra, si mundet që Albana Fico të vërë në këtë pozitë prindërit dhe t’u vërë atyre kushte për fëmijët e vetë. Me pak fjalë, përmes kësaj letre ISHP tregon se sido që të mendojnë prindërit fëmijëve do t’u merren këto të dhëna, do t’u bëhen e disa pyetje që “nuk u tregohen” publikisht. Në letër prindërve iu thuhet se mund të njoftojnë mësuesin e fëmijës nëse nuk dëshirojnë që fëmija e tyre të pyetet. Por, a mund të jemi sot të sigurtë që ky mos aprovim i prindërve do të përcillet tek ISHP?! A mund ta kemi siguri që fëmijët nuk do të pyeten nëse prindërit nuk duan?! Në situatën që ndodhemi asgjë nuk është e sigurt. Për aq kohë sa vetë shteti ka publikuar të dhënat më personale të mijëra qytetarëve. Nuk mund të jemi të sigurt për aq kohë sa prej javësh të sistemet e institucioneve në vend janë në duart e hakerave dhe asgjë nuk është zgjidhur deri më tani.
Lali Eri dhe “Bela” imponojnë fëmijët
Nuk jemi fare të sigurt për aq kohë sa kryebashkiaku i Tiranës Erion Veliaj dhe ministrja Belinda Balluku shkojnë në shkolla dhe iu bëjnë “presion” fëmijëve. Në postimin e tij analisti Kola ka shënuar edhe një koment, përmes të cilit ka dhënë një tjetër informacion të rëndësishëm. Ai ka thënë se OSHEE, me urdhër të ministres së Energjisë Belinda Balluku kanë shkuar në çdo klasë dhe iu kërkojnë fëmijëve të kursejnë energji. Me siguri iu kanë mësuar se si në kohën e komunizmit, prindërit e tyre mësonin me qirinj ndezur.
“Kanë hyrë në klasë OSHEE për t’u mësuar si të kursejnë energjinë elektrike. Ditën e parë të shkollës Erion Veliaj u dërgon letër të gjithë fëmijëve. Është bërë shkolla një han pa porta ku futet gjithkush që do që t’i përdorë fëmijët, por nuk futet dot prindi që i ka bërë kokën. Dhe në fund një refren etatist: prindi nuk ka të drejtë t’u imponojë fëmijëve bindjet dhe zgjedhjet. Ka të drejtë vetëm plerioni”, shkruan analisti. Nuk mund të themi në asnjë mënyrë që këto janë veprime demokratike, por duhet të themi se SPAK dhe institucionet e tjera duhet të veprojnë, para se vendi të bëhet totalisht i nënshtruar nga pushteti i disa politikanëve.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post