Aferat korruptive me koncesionet në vendin tonë nuk kanë të mbaruar. Vazhdimisht janë publikuar skandale me kontratat favorizuese që qeveria bën me disa kompani, ndërsa të dhënat e “Open Data” tregojnë që edhe përgjatë këtij viti janë rinegocuar në mënyrë të fshehtë disa kontrata të tjera.
Sqarojmë këtu se, rinegocimi përkon me Ndryshimin e Kontratës apo Marrëveshjes Koncesionare. Ky ndryshim me rinegocim mund të prekë elementë si objekti, palët, afatet, kushtet apo vlerën e kontratës, por edhe shumë element të tjerë që cenojnë xhepat e qytetarëve. Sipas raportit, viti 2020 ka më shumë rinegocime, pasi janë ndryshuar pesë kontrata koncesioni. Po kështu në janar – prill 2021 janë rinegociuar dy marrëveshje koncesionare.
Konkretisht, në shkurt të këtij viti Aeroporti i Rinasit iu dha me koncesion “Kastrati Group”, një nga kompanitë më të përkëdhelura të qeverisë. Ajo që ra në sy është se, ndryshe nga herët e tjera afati i kontratës për këtë kompani u bë 35 vjet. Pra, nëse gjërat nuk ecin si duhet të gjitha pasojat do t’ vuajnë qytetarët, pasi edhe detyrimi i shtetit ndaj kësaj kontrate është i lartë. “Në datën 1 dhjetor 2020 Shoqëria zotëruese Real Fortress Private Limited shiti të plota kuotat e saj në favor të shoqërisë shqiptare Kastrati Group me çmim shitje 71 milion Euro. Me Ligj të Miratuar në Kuvend nr 16/2021 data 8 shkurt 2021, Ligjvënësi shtoi jetëgjatësinë e Koncesionit me trembëdhjetë vite të tjera afat operimi. Afati i marrëveshjes koncesionare u bë 35 vjet”, thuhet në raport.
Skandali thellohet pasi qeveria ka nënshkruar shtyrjen dhe ndryshimin e kontratës për koncesionarin në portin e Durrësit, në kohën kur vendi ishte i paralizuar nga pandemia. Sipas të dhënave, qeveria ka ndryshuar dy herë në mënyrë të fshehtë kontratën për këtë kompani.
“Për Koncesionin për ndërtim, shfrytëzim dhe transferim të një porti të llojit MBM në Porto Romano, Durrës, kontratë që zbatohet nga shoqëria koncesionare Porti MBM, Kjo kontratë është Miratuar me Ligjin nr. 58 në Kuvend në datën 30. Prill 2020, që përkon me datë në të cilën vendi ishte shpallur Në Gjendjen të Fatkeqësisë Natyrore”, thuhet në raport.
Ashtu sikur e prekëm pak më lartë pasojat financiare që sjellin rinegocimet e këtyre kontratave do të paguhen nga ne si taksapagues. Më konkretisht, ky skandal mund të vërtetohet me favoret që i janë bërë kompanisë “S2 Albania sh.p.k”. Qeveria vendosi të shtyjë pagesën e kësteve për muajt shtator, tetor, nëntor 2020, si dhe shtyrjen e pagesës së këstit të prapambetur të muajit Gusht, pa penalitete apo interesa mbi këto këste. Këto pagesa do të likujdohen nga ana e Autoritetit Kontraktor nga 1 Janar- 31Dhjetor 2022. Por, problemi është se, për këtë shtyrje së bashku me këstin rregullt vjetor qeveria me paratë tona do detyrohet të paguaj 16. 591 598 Euro.
Po ku do t’i gjej qeveria këto para, duke qenë se buxheti është dobët me të ardhura?! Sigurisht duke vjelur pa kriter taksat nga qytetarët dhe bizneset.
E.H /gijotina.com/
