Arben Dani , shoferi i ish-deputetit të PS, Ilir Beqja është arrestuar sot nga policia e komisariatit Nr.3.
Dani akuzohet se ka përndjekur rregullisht dhe ngacmuar seksualisht një qytetare me iniciale M.M.
Kjo e fundit ka denoncuar në komisariatin n.3 për rastin, duke pretenduar se komshiu i saj në pallat, e ka përndjekur dhe ngacmuar seksualisht për një kohë të gjatë. Pas denoncimit në polic, Arben Dani është marrë në pyetje dhe më pas është arrestuar duke u akuzuar për veprën penale të “Përndjekjes”.
Dani ka dalë ditën e djeshme para gjykatës së Tiranës, ku fillimisht prokurori i çështjes ka kërkuar caktimin e masës së “arrestit në burg”. Por pas depozitimit të disa provave materiale nga ana e avokates mbrojtëse, si fotografi dhe gjendjen e punësimit të të arrestuarit, prokuroria ka mbajtur qëndrim tjetër në sallën e gjyqit, duke i kërkuar gjykatës caktimin e masës e “arrestit në shtëpi” për Arben Dani.
Kjo kërkesë e përfaqësuesit të akuzës, është pranuar nga gjykata e Tiranës, duke urdhëruar që shoferi i socialistit Ilir Beqja, të lirohet nga qelia dhe të qëndrojë me masën e sigurisë “arrest shtëpie”. Sipas dosjes hetimore, Dani në mënyrë të vazhdueshme ka përndjekur M.M, e cila është banore në të njëjtin pallat ku banon dhe personi i arrestuar. Çështja vijon të qëndrojë ende në hetim nga prokuroria e Tiranës, ndërsa pritet që në ditët në vijim të ketë një qartësim të plotë të përgjegjësisë penale të Arben Danit.
Discussion about this post