Sulmuesi i Al Ittihad, Karim Mostapha Benzema do të lërë Arabinë Saudite për pak ditë, për t’u kthyer në vendlindje. Shkak është bërë një hetim parlamentar që është hapur për Federatën Franceze të Futbollit dhe veprimet brenda këtij institucioni në vitet e fundit.
Sipas mediave transalpine, një Komision Parlamentar i “vënë në jetë” që kur shpërtheu skandali me ish-presidentin Noel Le Graet, ka kërkuar që shumë emra të njohur të japin dëshmi para tij për mënyrën se si janë trajtuar në FFF. Hetimet përfshijnë diskriminimin me bazë racore, veprime korruptive apo edhe seksizëm.
Deputetja Sabrina Sebalhi kishte bërë kërkesën që në qershor për hapjen e një hetimi të tillë dhe tashmë ka ardhur momenti i dëshmive të personave që mendohet se kanë vuajtur pasojat e sjelljeve të papërshtatshme të drejtuesve apo janë në dijeni të tyre.
I tillë është Benzema, por edhe emra si Patrick Vieira e Laurent Blanc, pa harruar këtu Ministren e Sportit në Francë, Ameli Oudea-Kastera e cila kërkoi menjëherë largimin e Le Graet nga drejtimi i federatës pasi ky i fundit lëshoi fraza tallëse në adresë të Benzema gjatë një interviste.
Discussion about this post