Skandalet nuk kanë fund me urbanët e Veliajt/ Përfshihet nga flakët autobusi para Ministrisë së Jashtme

Një autobus i transportit urban në kryeqytet është përfshirë nga flakët para Ministrisë së Jashtme. Në fakt është urbani i linjës më propganduese të Veliajt, ai i Green Line

Sipas pamjeve të siguruara nga BalkanWeb, autobusi ka marrë flakë në pjesën e motorit, për shkaqe ende të paqarta.

Sakaq, ende nuk dihet nëse autobusi ka pasur pasagjerë në pjesën e brendshme të tij në momentin e nisjes së zjarrit.

Një nga projektet për të cilat kryebashkiaku i Tiranës, Erion Veliaj, është mburrur shpesh gjatë mandatit të tij është linja e autobusëve “Green Line”, që u paraqit si një hap drejt modernizimit të transportit publik në kryeqytet. Por, ndryshe nga imazhi që është promovuar në publik, kjo linjë është përfshirë në një sërë skandalesh dhe incidentesh të rënda.

Përtej propagandës institucionale, problemet me linjën “Green Line” kanë qenë të shumta dhe serioze: autobusë jashtë standardeve, mungesë ajrimi, vonesa të vazhdueshme dhe, në disa raste, aksidente që kanë vënë në rrezik jetën e qytetarëve. Këto ngjarje kanë ngritur pikëpyetje të mëdha mbi sigurinë dhe menaxhimin e kësaj linje.

Për më tepër, mungesa e transparencës lidhur me kontratat dhe mënyrën e funksionimit të operatorit privat që administron linjën ka shtuar dyshimet për favorizime dhe lidhje të dyshimta me pushtetin lokal.

Ndërsa qytetarët përballen çdo ditë me pasojat e një sistemi të çalë transporti publik, drejtuesit e bashkisë vazhdojnë të promovojnë një realitet tjetër – atë të një qyteti që ecën drejt së ardhmes, por që në të vërtetë ecën me autobusë që rrezikojnë jetën e atyre që duhet të shërbejnë.