Një deklaratë e bujshme ka bërë xhiron e rrjetit sot në Itali, pasi ish-kampioni i Botës me Italinë në vitin 1982, Klaudio Xhentile ka lëshuar një akuzë të rëndë rreth viteve kur ai drejtonte ekipin U21 të Italisë.
Ai ka folur për eliminimin e Italisë nga rrugëtimi drejt Botërorit në një intervistë për “La Repubblica”, duke e cilësuar një njollë të madhe për futbollin italian. “Më dhemb. Është sikur humbjet e vazhdueshme të ekipit kombëtar të kenë fshirë pak nga ajo që të gjithë arritëm. Një njollë mbi të gjithë. Si të dalim nga kjo? Duke ndryshuar sistemin nga A në Zh, jo vetëm disa emra. Federata e Futbollit duhet të rindërtohet plotësisht, duhet t’u japim trajnerëve lirinë e tyre përsëri. Ekipet bëhen nga agjentët, madje edhe ekipi kombëtar, veçanërisht ekipi kombëtar”, ishte deklarata e tij, duke lëshuar më pas “bombën”.
“Kur po drejtoja ekipin U21, ata erdhën tek unë me një çantë plot me para. Më thanë “janë të tuat nëse grumbullon ata që themi ne”. U thashë të largoheshin menjëherë, përndryshe do të telefonoja policinë. Si përfundoi? Më hoqën qafe. Nëse nuk je “kukull”, nuk je pjesë e lojës”, tha Xhentile. Ai u shkarkua nga detyra e tij në vitin 2006, kur Federata drejtohej nga Guido Rosi dhe Demetrio Albertini, edhe pse ishte Kampion Europe në fuqi me U21 të Italisë, si dhe kishte siguruar medaljen e bronztë në Lojërat Olimpike.
gijotina.com/
Discussion about this post