Rrëmujat në futbollin turk po thellohen. Një gjykatë në Stamboll ka urdhëruar paraburgimin parandalues të Murat Özkaya-s, presidentit të Eyüpspor, si edhe të shtatë gjyqtarëve, të akuzuar për ndikim në rezultatet e ndeshjeve.
Por hetimet nuk ndalen këtu: Federata Turke e Futbollit ka referuar plot 1.204 futbollistë në komitetin disiplinor për përfshirje në baste sportive.
Federata e ka cilësuar këtë veprim si një masë “parandaluese” për të pastruar futbollin profesionist. Nga mbi 1 mijë lojtarë të përfshirë në hetime, 27 prej tyre luajnë në Superligë, mes tyre dy futbollistë të Galatasaray, dy të Besiktas dhe një i Trabzonspor. Ndërkohë, 77 të tjerë aktivizohen në Ligën e Dytë.
Lojtarët e përfshirë sipas klubeve
Besiktas: Ersin Destanoğlu, Necip Uysal
Alanyaspor: İzzet Çelik, Enes Keskin, Yusuf Özdemir, Bedirhan Özyurt
Rizespor: Efe Doğan, Furkan Orak
Galatasaray: Metehan Baltacı, Evren Eren Elmalı
Gaziantep FK: Muhammet Taha Güneş, Nazım Sangare
Göztepe FK: İzzet Furkan Malak, Uğur Kaan Yıldız
Antalyaspor: Kerem Kayaarası
Eyüpspor: Mükremin Arda Türköz
Kasımpaşa: Ege Albayrak, Ali Emre Yanar
Fatih Karagümrük: Furkan Bekleviç, Kerem Yusuf Sirkeci
Samsunspor: Celil Yüksel
Trabzonspor: Salih Malkoçoğlu
Skandali shpërtheu pas hetimeve disa mujore mbi bastet e paligjshme në futbollin turk. Si rezultat i fazës së parë të kontrolleve, 149 gjyqtarë u pezulluan, ndërsa mbi 40 delegatë ndeshjesh u detyruan të jepnin dorëheqjen. Pas dosjes së përgatitur nga TFF, prokuroria kërkoi paraburgim për 17 gjyqtarë dhe një gazetar sportiv, ndërsa 11 persona të tjerë u lanë të lirë me kusht.
Murat Özkaya, i cili ka qenë në krye të Eyüpspor gjatë një periudhe suksesi historik — përfshirë ngjitjen në Divizionin e Dytë dhe më pas kalimin në Superligë në vitin 2023 — akuzohet se ka qenë pjesë e një rrjeti që ndikonte në rezultatet e ndeshjeve përmes gjyqtarëve.
Federata Turke ka deklaruar se do të vijojë me masa të forta për “çrrënjosjen e fenomenit”, ndërsa gjykata po shqyrton mundësinë që gjyqtarët e përfshirë të kenë manipuluar rezultatin e disa ndeshjeve zyrtare.
Skandali pritet të ketë pasoja të mëdha në futbollin turk, me pezullime, dënime dhe hetime të tjera që priten në ditët në vijim.
Discussion about this post