Skandali i domateve me pesticide të “Era Fruit”/ Arrestohen tre persona në Berat, dy prej tyre inspektorë të AKU (Emrat)

Prokuroria e Beratit ka firmosur disa urdhër-arreste pas hetimeve mbi eksportin e domateve me nivele të larta pesticidesh nga subjekti “Era-Fruit”. Sipas njoftimeve zyrtare, tre persona janë ndaluar nga Seksioni Kundër Krimit Ekonomik dhe Financiar i Policisë së Shtetit dhe Prokuroria e Beratit.

Bëhet fjalë për Mariglen Maliq Qorri, 35 vjeç, pronar i “Era-Fruit”, si dhe për inspektorët e AKU Berat, Ronaldo Agim Lika dhe Griselda Genci Doksani.

Ndërsa Qorri dyshohet për veprat penale “Importimi, prodhimi, shitja dhe ruajtja e ushqimeve të rrezikshme për shëndetin ose jetën e njerëzve”, “Mashtrimi me produktet ushqimore” dhe “Falsifikimi i dokumenteve”, inspektorët dyshohen për “Shpërdorim detyre”.

Hetimet kanë zbuluar se autoritetet kroate kanë konstatuar dhe më pas asgjësuar rreth 8 ton domate të eksportuara nga “Era-Fruit”, të cilat pas analizave rezultuan me nivel të preparatit “Chlorfenapyr” 0.06 mg/kg, mbi normën e lejuar prej 0.01 mg/kg.

Po ashtu, rezultoi se Qorri kishte përdorur një faturë fiktive për të justifikuar origjinën e produktit gjatë procedurave doganore dhe raportit të gjurmueshmërisë nga AKU Berat.

Nga hetimet rezultoi gjithashtu se inspektorët Lika dhe Doksani, pas njoftimit nga sistemi Rasff, kryen inspektim në subjekt më 29 gusht 2025, por nuk konstatuan sasinë e domateve në magazinë dhe morën si të rregullt faturën fiktive të Qorrit, duke mos kryer bllokimin dhe marrjen e mostrave për analiza.

Gjithashtu u sekuestruan dhe u morën mostra për analiza të produkteve të ndryshme si domate, speca dhe kastraveca të konstatuara ne subjektin “Era Fruit”, produkte këto të dyshuara të kontaminuara.

Arrestimet:

Mariglen Maliq Qorri, i datelindjes 06.01.1985, Pronar i subjektit “Era fruit” si i dyshuar per veprat penale “Importimi, prodhimi, shitja dhe ruajtja e ushqimeve të rrezikshme për shëndetin ose jetën e njerëzve”, “Mashtrimi me produktet ushqimore” dhe “Falsifikimi i dokumenteve”, parashikuar nga nenet 288, 288/c dhe 186 te K.Penal.

Ronaldo Agim Lika, i ditëlindjes 07.08.1998, inspektor për sigurinë ushqimore pranë AKU Berat, si i dyshuar për veprën penale “Shpërdorimi i detyrës”, parashikuar nga neni 248 i K.Penal.

⁠Griselda Genci Doksani, e datëlindjes 05.12.2000, inspektore për sigurinë ushqimore pranë AKU Berat, si e dyshuar për veprën penale “Shpërdorimi i detyrës”, parashikuar nga neni 248 i K.Penal.