Janë shpallur në kërkim ndërkombëtar Klodian Zoto dhe Stela Gugallja, dy personat kyç të përfshirë në skandalin e inceneratorit të Elbasanit, që vuri pas hekurave ish-ministrin Lefter Koka.
Pasi kanë kaluar 30 ditë dhe policia pas kërkimeve në vend nuk ka mundur t’i lokalizojë, Gugallja dhe Zoto vendosen tashmë në kërkim ndërkombëtar. Gugallja kërkohet në cilësinë e ortakut të vetëm dhe administratorit të shoqërisë “Albtek Energy” sh.p.k kurse Klodian Zoto, në cilësinë e ortakut të vetëm dhe administratorit të shoqërisë “Integrated Technology Services” sh.p.k.
Pas arrestimit të Kokës, SPAK shpjegoi se në cilësinë e ministrit të Mjedisit ai ka shkelur procedurat për dhënien e licencës dhe miratimin e vijimit të ndërtimit të objektit, ndërsa Gugallja e Zoto, akuzohen se kanë pastruar para dhe kanë dhënë ryshfet në drejtim të Kokës me qëllim sigurimin e lejes për ndërtimin e inceneratorit për të gjeneruar më pas fatura fiktive duke u vjedhur shtetit rreth 3.6 milion euro.
Ish-ministri i Mjedisit, Lefter Koka, u arrestua nga Prokuroria e Posaçme Kundër Korrupsionit dhe Krimit të Organizuar (SPAK) për shpërdorim detyre dhe korrupsion me procedurat, kontratat dhe ndërtimin e inceneratorit të mbetjeve urbane të Elbasanit, e cila shkonte në 21.6 milionë euro. Koka, thuhet në njoftimin e SPAK, ka kërkuar dhe ka marrë nga dy shoqëritë përfitime monetare të tërthorta, duke krijuar me disa shoqëri të tjera skema fiktive për punime të pakryera, për të mbuluar korrupsionin e tij.
Pas hetimeve të kryera, SPAK ka zbuluar se shuma prej 3.6 milion eurosh i është dhënë në formë ryshfeti pikërisht Lefter Kokës./ D.L./Gijotina.com
Discussion about this post