Një skandal financiar në përmasa shqetësuese është zbuluar nëpërmjet një dosjeje të përgatitur nga Prokuroria e Tiranës dhe tashmë në duart e SPAK, që heton rolin e disa prej bankave më të mëdha në vend në transferimin dhe shitjen e kredive të këqija drejt subjekteve që kanë ushtruar presion dhe abuzim sistematik ndaj qytetarëve shqiptarë.
Në qendër të këtij hetimi që pritet të çojë në arrestime dhe sekuestrime të aseteve, janë bankat Raiffeisen Bank, Banka Kombëtare Tregtare (BKT) dhe ProCredit Bank, të cilat rezultojnë të kenë pasur bashkëpunim të drejtpërdrejtë me kompanitë Mikro Credit Albania (MCA) dhe Final, tashmë me licencat e hequra, aktivitetin e mbyllur dhe nën sekuestro.
❗Si funksionoi skema?
Bankat, veçanërisht Raiffeisen Bank dhe ProCredit, shitën portofolin e kredive të pashlyera kompanisë MCA, e cila në bashkëpunim me 3 shoqëri përmbarimore të lidhura dhe ish-përmbarues gjyqësorë, zbatuan një plan të koordinuar për të nxjerrë përfitime masive:
-
Qytetarëve u sekuestroheshin llogaritë bankare, shpesh llogari page, edhe pasi kishin shlyer detyrimet.
-
Ata detyroheshin të merrnin kredi të reja për të “ristrukturuar” ato të vjetrat – një formë skllavërie financiare.
-
Edhe pas marrjes së pronave me ankande fiktive, skema vijonte: qytetarët mbeteshin përsëri debitorë, me pasuri të tjera që vijonin të sekuestroheshin.
📉 Përmasat e dëmit:
-
Vetëm në BKT janë sekuestruar 11 mijë llogari bankare, shumica llogari page.
-
Në vitin 2023, MCA përfitoi rreth 30 milionë euro, ndërsa Final mbi 6.8 milionë euro nga borxhe të konsideruara “të këqija”.
-
Rreth 1,700 pasuri të paluajtshme janë sekuestruar përmes ankandeve fiktive.
-
Skema ka zhytur qytetarë të tërë në pamundësi jetese, me llogari të bllokuara dhe prona të humbura.
🕯 Përmendet edhe viktima Pal Trashaj
Në dosje përfshihet dhe rasti tragjik i Pal Trashaj, i cili humbi jetën në një akt vetëflijimi në derën e SPAK, pas vuajtjeve të vazhdueshme nga padrejtësitë e kësaj skeme.
👥 Kush po heton?
Dosja është ndjekur nga prokurorët Antoneta Sevdari, Ndini Tavani dhe Arben Agovi dhe tashmë është në fazë finale të hetimeve me pritet që SPAK të ndërmarrë masa të ashpra ligjore ndaj të përfshirëve, përfshirë ish-drejtues të bankave, përmbarues privatë dhe administratorë të MCA dhe Final.
Ky skandal është një nga më të mëdhenjtë të dekadës në sektorin bankar dhe financiar në Shqipëri, ku institucione që duhet të mbronin qytetarët, kanë shitur interesat e tyre te abuzuesit më të egër të kapitalizmit të egër.
🛑 A do të marrë drejtësi qytetari i zakonshëm që u zhyt në borxh, humbi pronën dhe u bllokua në heshtje? Kohët në vijim do ta tregojnë.
Discussion about this post