Skandali me rrjedhjen e informacionit të pagave nxori në pah një fenomen tejmase të përhapur në Shqipëri, atë të evazionit në tregun e pagave. Lidhur me këtë fenomen ministrja e Financave Delina Ibrahimaj, u shpreh se nuk do të ketë aplikim të pagave referencë, pasi sipas saj ky është një vendim antikushtetues.
“Nuk do të aplikojmë paga referencë, por do të shohim mesataret e tregut për profesione të caktuara, për të parë nëse paga është e nëndeklaruar apo jo”, u shpreh Ibrahimaj.
Ibrahimaj bëri me dije se Ministria e Financave iu ka nisur një letër të personalizuar rreth 10 mijë bizneseve, të cilat kanë deklaruar paga minimale.
“Ne nuk kemi si synim të rëndojmë bizneset, ndaj dhe fillimisht kemi nisur me dërgimin e letrave të personalizuara, për mbi 10 mijë prej tyre, ku janë vërejtuar deklarime pagash minimale”, u shpreh ajo.
Ibrahimaj u shpreh se gjatë vitit 2022 institucioni që ajo drejton ka në fokus goditjen e këtij fenomeni, ndaj tregu i pagave do të jetë nën survejimin e Ministrisë së Financave.
Discussion about this post