Një tjetër superskandal i rrjedhjes të të dhënave personale në rrjet siç ishte ai i pagave, nxorri gjithashtu edhe rrogat e nënpunësve të shtetit. Këtë herë nuk është më fjala për të dhënat preferenciale të patronazhistëve socialistë që u përdorën për zgjedhjet e 25 prillit po për të gjitha pagat e sektorit privat dhe shtetëror në Shqipëri.
Në listën e publikuar janë edhe pagat e punonjësve të Fondit Shqiptar të Zhvillimit, institucion i cili zbaton projekte të integruara dhe komplekse që synojnë zhvillimin e qëndrueshëm social dhe ekonomik, në infrastrukturën rrugore, ujësjellës-kanalizime, urbanizim dhe në zhvillimin e sektorit të turizmit.
Ky institucion i cili menaxhon edhe miliona lekë të taksave të shqiptarëve, rezulton me paga shumë të larta. Sipas Exelit i cili ka rrjedhur në internet, paga e një shoferi të këtij institucioni, është 196.636 lekë të reja, ose rreth 2 milionë lekë të vjetra. E njëjta gjë është edhe për shoferët e tjerë të FSHZH, ku më e ulëta është 1.530.000 lekë të vjetra.
Kjo pagë për këtë funksion, është shumë e lartë nëse e krahasojmë me pagat e shumicës së nënpunësve të administratës shtetërore. Kujtojmë se një mësues në Shqipëri merr deri në 500 mijë lekë të vjetra, që do të thotë sa çereku i rrogës të një shoferi të Fondit Shqiptar të Zhvillimit.
Në dokumentin që e zotërojnë shumë shqiptarë në programin Exel, janë numrat e kartave të identitetit, emrat e personave, numri personal, qendra e punës ku punojnë funksioni që kryejnë dhe paga qe marrin. Aty gjenden drejtorë bankash, Ceo të kompanive të mëdha por edhe punonjës shtetërorë që nga presidenca e deri tek selitë e huaja diplomatike në vend.
Gijotina.com
Discussion about this post