Partia Demokratike ka reaguar sërish lidhur me skandalin e publikimit të pagave të mbi 630 mijë qytetarëve shqiptare që punojnë në sektorin publik apo privat.
Nënkryetarja e PD, Jorida Tabaku është shprehur se ky skandal është pjesë e skemës së patronazhistëve dhe që tregon se shteti ka rënë në duart e krimit.
“Ky skandal ilustron se si shteti ka rënë në duart e militantëve patronazhistë që veprojnë për të mbrojtur pushtetin e paligjshëm të Edi Ramës, dhe gjithashtu eskpozon kalbësirën brenda këtij sistemit putinist, ku taksat e qytetarëve, edhe në formën e pagave të majme, përdoren për të shpërblyer përfituesit e PPP-ve dhe koncesioneve. Duke dëmtuar kështu tregun dhe profesionistët e ndershëm të vendit tonë, që shohin se si të ardhurat e korrupsionit, pastrimit të parave dhe evazionit fiskal, konkurrojnë padrejtësisht me leje të partisë-shtet”, tha Tabaku.
Deputetja demokrate risolli në vëmendje skandalin e inceneratorëve, duke shtuar se me taksat që iu vidhen shqiptarëve, shpërblehen ata që sot janë në kërkim.
Sipas saj, në të njëjtën mënyrë edhe ministra të tjerë të qeverisë Rama si Ahmetaj apo dhe Gjiknuri, Bllakon përfshirë edhe Agaçin, Sejdinin, Subashin apo dhe vetë Erion Veliaj kanë përdorur formula të tilla për të përfituar miliona euro nga taksat e qytetarëve shqiptarë.
Ndër të tjera, Tabaku u shpreh se Partia Demokratike do të vazhdojë ta denoncojë këtë aferë, por njëkohësisht do të hedh dritë edhe në Komisionin Hetimor pavarësisht të gjithë pengesave.
Discussion about this post