Skandali i “patronazhistëve”, ironizon Strakosha: Nuk e di çfarë janë!

Skandali i “patronazhistëve” ishte kryefjala e zgjedhjeve të 25 prillit në vend, ndërsa sot ka qenë fokusi i debatit në Komisionin e Ligjeve.

Nënkryetari i PD, Enkelejd Alibeaj pyeti Komisioneren e Mbikëqyrjes së Shërbimit Civil, Pranvera Strakosha nëse kanë konstatuar raste të tilla të patronazhistëve, ndërsa kjo e fundit ironizoi duke thënë se nuk e di se çfarë është një patronazhist. 

Alibeaj: Kanë ndodhur ngjarje që prekin shërbimin civil, flas për zgjedhjet. Ka nëpunës civil që janë angazhuar në veprimtari politiko-elektorale. Është shqetësim publik. Keni kryer ndonjë monitorim? Çfarë ju ka rezultuar? Por, ofrimi i posteve të punës në institucione të ndryshme që duhet të ishin nën suazën e shërbimit civil të mbulohen me punësime të përkohshme? Zonja mund të thotë s’kam pasur para ta bëj, ose kam bërë kaq punë se kaq para kam pasur.

Strakosha: Është hera e tretë që kemi hetuar. Kemi kërkuar ngritjen e grupeve të monitorimit. Kemi nxjerrë dhe mungesa të pajustifikuara të punonjësve. Nuk po bëj politikë. Kemi konstatuar që këta persona nuk kanë qenë në shërbimin civil. Që nga ky moment, nuk ka kompetencë shërbimi civil.

Alibeaj: Unë ju bëra një pyetje. Një nga çështjet që ka tërhequr vëmendjen e publikut, do dali në fund, atë të patronazhistëve.

Strakosha: Verifikojmë veprimtarinë gjatë orarit të punës. Jashtë orarit të punës janë të lirë të marrin pjesë në fushata, por jo të mbajnë qëndrime publike dhe fjalime. Nuk e di çfarë është patronazhisti, di çfarë është nëpunësi civil.