Rrjedhja e të dhënave sensitive dhe skandali i pagave apo targave të qytetarëve duket se do të ketë një përgjegjës. Ndërsa shumë qytetarë fajësojnë organet kompetente si jofunksionale dhe të paafta për të mbrojtur privatësinë e tyre, hetimet duket se po merren me emra të përveçëm që për arsye hetimore nuk bëhen publike.
Sipas burimeve specialistë të shefave të IT në dy institucionet, Tatime dhe ISKSH, nga ku dyshohet se ka pasur rrjedhje informacioni janë marrë në pyetje. Njësia “C” e specializuar për krimet kibernetike dhe Prokuroria e Tiranës, tashmë kanë administruar dhe kallëzimin penal të Ministrisë së Financave, teksa nga hetimet e deri tanishme është evidentuar një specialist IT, i cili rezulton se gjatë periudhës Janar – Prill 2021 e në vijim, në mënyrë të paautorizuar ka hyrë në sistemin e të dhënave mbi pagat. Ky punonjës mësohet se është mes 10 zyrtarëve të IT-së, që janë marrë në pyetje për këtë çështje.
Pavarësisht fakteve që dëshmojnë këtë veprimtari tijën, personi nën hetim ka mohuar të jetë ai përgjegjës, ndërsa organet hetimore për sulmet kibernetike mësohet se kanë mjaftueshëm fakte që implikojnë këtë person.
Sipas rregullores së Tatimeve çdo punonjës IT duhet të futet me “Username” në serverin e rrogave, duke pasur një autorizim të posaçëm me E-Mail apo qoftë dhe me dokument shkresor. Njëherësh dhe me autorizimin jepet dhe arsyeja dhe qëllimi i futjes në sistemin e pagave mujore.
Persona në fjalë nuk ka zbatuar procedurën e mësipërme duke bërë që të jetë i dyshuari kryesor për shpërndarjen e të dhënave sensitive të 637 mijë qytetarëve. Ndërkohë janë 10 punonjës që po hetohen, ndërsa mësohet se personat që zotërojnë “username” për të aksesuar këto të dhëna janë të shumta, por megjithatë marrja e të dhënave mund të kryhet vetëm nga databaza qendrore, ku janë numrat e ID, pozicioni i punës, kompania, duke e bërë procesin akoma më kompleks.
Discussion about this post