Deputeti i Partisë Demokratike, Eno Bozdo e cilësoi KAYO-n si një “guaskë ligjore” dhe jo një ndërmarrje, duke theksuar se kompania nuk ka aktivitet prodhues pas krijimit të saj, përveç ngritjes së 4 shoqërive private.
Në një konferencë për mediat, ai theksoi se 4 shoqëritë “TIMAK Defense”, “Advanced Armed Tech”, “MKD” dhe “Guna Tactical” gjithashtu nuk kanë kapacitete prodhuese apo kapital të rëndësishëm dhe thelbësor.
“Realiteti është që KAYO nuk prodhon asgjë. Zero veprimtari në bilancet e viteve 2024-2025. E vetmja veprimtari e saj që nga regjistrimi është krijimi i katër shoqërive me privat. Në periudhën gusht-nëntor 2025. Dhe këtu dua të citoj pastaj një direktivë shumë të rëndësishme të Bashkimit Evropian… përjashtimi nga prokurimi nuk vlen kur shoqëria kontrollohet nga privati. Por kjo është skemë që i ofron privatit guaskën mbrojtëse të pronësisë publike të KAYO-s, e cila është boshe vetë.”, u shpreh ai.
Ai shtoi se asnjë institucion nuk mund t’i kontrollë dot për shkak se të treja ligjet për kontrollin e fondeve publike, nuk arrijnë dot të operojnë kur shumicën e bordit të një kompanie private dhe pronësinë reale e ka privati.
“Të tre ligjet që janë thelbësore për kontrollin e fondeve publike (ligji për prokurimin publik, ligji për veprimtarinë e KLSH-së, auditi i brendshëm) nuk arrijnë dot të operojnë kur shumicën e bordit dhe pronësinë reale e ka privati. E thënë thjesht, këto shoqëri blejnë ku të duan, me çmimin që vendosin ato vetë dhe ia shesin shtetit pa tender, pa auditim dhe pa llogaridhënie. E askush nuk kupton dot asgjë ku përfundojnë paratë.”, shtoi ai.
Discussion about this post