Skandali, KESH i jep kontratën personit nën hetim për abuzim me tendera

2 javë më parë

Në 30 maj Koorparata Elektroenergjitike Shqiptare (KESH) mban tenderin për demontimin e vinçit 100/5 ton në HEC-in e Vaut Dejës, kontratë e cila parashikon fondin limit me vlerë 20 milionë lekë ose 167 mijë euro. Në garë ka marrë pjesë vetëm “Junik” shpk në pronësi të Dedë Malutaj e cila shpallet automatikisht fituese në 14 qershor, kompani e cila ka fituar kontrata publike nga Programi i Rindërtimit.

Gara për tenderin është njollosur jo vetëm ngaqë nuk ka patur garues të tjerë, por pasi në 28 maj dy ditë para mbajtjes së tenderit, sipas “Shqiptarja.com” Gjykata e shkallës së parë Tiranë shpalli në kërkim administratorin e kompanisë Dedë Malutaj dhe drejtuesin teknik Vladimir Malutaj si dhe u arrestuan Ardian Lloshi, administrator në “Tirana New Supervizor”, Ibrahim Dragoshi administrator në “IMES-D” shpk. Këta persona akuzohen se kanë vendosur në Prokurorinë e Elbasanit pajisje për ngrohje dhe ftohje që kanë rezultuar me defekt dhe jashtë përdorimit. Gjatë dimrit të kaluar, ka rezultuar se pajisja e kondicionerit “Chiller” nuk ka funksionuar për ngrohjen e godinave.

Duke iu referuar “Shqiptarja.com”, Gjykata e Apelit e rrëzoi vendimin e datës 28 maj 2022 të Gjykatës së Shkallës së parë Tiranë e cila i kishte lënë në burg duke vendosur detyrim paraqitje për Ardian Lloshin, administrator në “Tirana New Supervizor”, Ibrahim Dragoshin administrator në “IMES-D” shpk, të 2 të arrestuar, si edhe Dedë Malutën, administrator te shoqëria “Junik” shpk dhe drejtuesin teknik, Vladimir Maluta, të cilët ishin të shpallur në kërkim nga Policia.

Problemi më i madh vjen nga KESH, institucion shtetëror që drejtohet nga Ergys Verdho, i cili ka ndryshuar përsëri dokumentat standarte të tenderit. Para disa ditësh Gijotina.com denoncoi kontratën me vlerë 1,4 milionë euro të cilës iu ndryshuan dokumentat për ta përfituar “A-T-D-ALBANIAN TECHNOLOGY DISTRIBUTION” shpk dhe “Info Business Solutions” shpk.

Nuk po flasim për një ndryshim të parëndësishëm, por për faktin se është hequr nga kushtet për të fituar tenderin licenca NS- 11 A (Punime mbi shina dhe traversa) e cila akordohet nga ministria. Menjëherë ngrihet pyetja, si nuk janë të nevojshme këto kushte kur kemi të bëjmë me një përbindësh metalik? Si do të kryhet kjo procedurë e cila paraqet rrezik në mjedisin e punës?

Duke patur një vepër inxhienerike të këtyre përmasave, ndërmarrja shtetërore me humbjet më të mëdha në vend, ka menduar se mungesa e një licence nuk prish punë duke vendosur në rrezik një nga mrekullitë energjitike në kohë krize për energjinë. Nuk mjafton fakti se KESH-i akoma edhe kësaj dite nuk ka deklaruar bilancet në QKB në shkelje me ligjin por gjatë viti 2014 ka rekordin e humbjeve me vlerë 184 milionë euro sipas Open Data Albania.

Kompania paraqet dyshime për mënyrën se si do të menaxhohen fondet publike që ushqehen me taksat e qytetarëve por rrezik edhe për veprat hidroenergjitike sepse nga konstatimet rezulton se përsëri nga KESH, kjo kompani ka marrë 2 kontrata publike pa garë me vlerë 100 milionë lekë ose 833 mijë euro.

Për periudhën 2014-2021 sipas transaksioneve nga dega e Thesarit, kjo kompani ka marrë nga buxheti i shtetit pagesa me vlerë 21 milionë euro duke u renditur pranë bizneseve që marrin më shumë fonde publike nga qeveria. / Armand Kullau-Gijotina.com

Të ngjashme