Nën kryetari i Lëvizjes Socialiste për Integrim, Petrit Vasili ka deklaruar se Kuvendi i Shqipërisë po bllokon prej 3 javësh projektligjin e LSI-së për heqjen e taksave të naftës duke e konsideruar si skandal.
Nëpërmjet një postimi në Facebook, Vasili, shprehet i indinjuar që qeveria nuk ka marrë masa konkrete për uljen e çmimeve në një periudhë të vështirë ekonomike, me çmimet e produkteve dhe karburanteve që rriten dita ditës.
“Skandali. Prej tre javësh Kuvendi bllokon projektligjin e LSI për heqjen e taksave të naftës! Kuvendi i Shqipërisë me shpejtësi rrufeje ndryshon Kushtetutën dhe miraton Akte Normative prej dhjetra e qindra milionë euro sa herë që i kërkon qeveria. Por në këto ditë tepër të rënda për qytetarët po ky Kuvend bllokon prej javësh projektligjin e paraqitur nga unë në emër të LSI për heqjen e taksës së qarkullimit dhe të karbonit nga karburantet duke ulur në këtë mënyrë çmimin. Pra ky Kuvend i rrëmbyer nga rilindasit dhe që telekomandohet nga oligarkët dhe Edi Rama me deputetët rilindas është kthyer thjesht në një çirak dhe përfitues prej tyre. Turp dhe faqe e zezë, që Edi Rama vazhdon me pazarin e ndyrë të Bordit të Transparencës dhe nuk voton ligjet, që ndihmojnë popullin për të ulur çmimet e karburanteve”, shkruan Vasili.
Kujtojmë se rritja e çmimit të naftës në 245 lekë për litër i vendosur nga Bordi i Transparencës dhe rritja e produkteve të shportës, ka nxjerrë sërish qytetarët në protestë, ku e radhës është ajo e ditës së sotme në orën 17:00 para Kryeministrisë.
Discussion about this post