Skandali i pagave në Shqipëri ka qenë në vëmendjen e mediave të huaja, të cilat theksojnë faktin se deri më tani askush nuk është vënë para përgjegjësisë për këtë çështje. Gazeta gjermane ‘Frankfurter Allgemeiner Zeitung’ thekson se viktimë e këtij skandali kanë rënë edhe vetë presidenti, kreu i qeverisë dhe anëtarët e shërbimit sekret. Sipas gazetës, është skandal që janë publikuar pagat edhe të punonjësve të shërbimeve sekrete.
“Të dhënat përfshijnë kartën e identitetit, punëdhënësin, rrogat mujore dhe numrat e telefonit. Ato janë shpërndarë në platformat sociale. Mediat shqiptare përllogarisin se 700 mijë persona janë prekur nga kjo rrjedhje të dhënash. Këtu përfshihen punonjës bankash, sipërmarrës, nëpunës civilë, punonjës të shërbimeve sekrete dhe të ushtrisë, si dhe gazetarë”, shkruan e përditshmja gjermane.
Më tej thuhet se autoritetet hetimore kanë konfiskuar disa servera, por ajo që theksojnë të gjithë mediat është se kjo është hera e dytë brenda vitit që ndodh një skandal i këtyre përmasave, por pa mbajtur kush përgjegjësi. “Kjo është rrjedhja e dytë e madhe e të dhënave në Shqipëri brenda një viti. Të dhënat e pothuajse një milion shqiptarëve rrodhën në media në prill përpara zgjedhjeve parlamentare. Deri më tani askush nuk ka mbajtur përgjegjësi për këtë rast”, shkruan FAZ. Dy ditë më parë u bënë publike të dhënat e pagave, të cilat përkonin ato të muajit janar 2021, ndërsa ditën e djeshme u publikuan të tjera të dhëna, të cilat i takonin muajit prill.
Discussion about this post