Kryeministri Edi Rama ka kërkuar ndjesë publike lidhur me publikimin e databazës me pagat mujore të 630 mijë qytetarëve shqiptarë që punojnë në shtet apo në privat dhe që shkaktoi një skandal me të dhënat personale.
“Nesër do bëjmë komunikim për nismën ndërkohë që sot ju kemi ftuar për të folur për ngjarjen e qarkullimit në rrjete e Whats App-it për të dhënat e pagave. Dua tu kërkoj ndjesë të gjithëve që janë shqetësuar me plot të drejtë për këtë ndërhyrje në këtë aspekt të jetës së tyre private, ndërkohë dua të nënvizoj se kjo është një ngjarje e cila meriton të hetohet imtësisht”, u shpreh kryeministri.
Kreu i qeverisë kërkoi nga Prokuroria që të nisin hetimet dhe të përgjigjen të gjithë inspektorët e tatimeve për këtë skandal.
“Kjo është një ngjarje, e cila meriton të hetohet imtësisht. Uroj dhe shpresoj që ta kryejnë këtë hetim me të gjitha kapacitetet e tyre. Dua të ndaj me publikun se në këndvështrimin tim, nuk është e vështirë të shohësh se ka një qëllim jo fort të vështirë për t’u kuptuar dhe për të nxitur destablitet në një përpjekje që nuk është e para. Duke pasur parasysh thirrjet nga Foltoret mund të mos jetë e fundit. Thirrja ime për prokurorinë është që të përgjigjen të gjithë pa përjashtim inspektorët e tatimeve. Ata që punojnë në këtë sistem apo dhe të tjerë që mund të jenë larguar por edhe ata që nga Foltoret e Kuvendeve paralajmërojnë zymtira të tjera”, tha Rama.
Lista, një dokument në formatin “excel” është duke qarkulluar në “Whats App” masivisht edhe përbën një shkelje flagrante të të dhënave personale të qytetarëve. Një skandal i ngjashëm u publikua disa ditë para 25 prillit, ku patronazhistët e qeverisë “Rama”, ndikuan që ky i fundit të fitonte për herët të tretë zgjedhjet parlamentare.
Discussion about this post