Skema për shpërndarjen e subvencioneve tek fermerët nuk është bërë në mënyrë e transparente dhe sipas nevojave, duke krijuar burokraci mes përfituesve. Këtë problematikë ka evidentuar Kontrolli i Lartë i Shtetit përmes një raporti të publikuar ditën e sotme, ku thuhet se disa fermerëve në vitin që lamë pas iu është dhënë dyfishi i subvencionit që ata meritonin, madje iu janë paguar edhe kontributet shoqërore dhe shëndetësore nga buxheti i shtetit. Ndërsa, disa fermerë të tjerë përveç se kanë paguar vetë të gjitha kontributetet nuk kanë përfituar dot subvencionim
“Problematikë mbetet subvencionimi i skemës së fshatit në një masë shumë më të madhe edhe në pagimin e pensioneve, duke krijuar subvencionim të dyfishtë për fermerët, si në kontribut, por dhe në përfitim, gjë që është e unifikuar në përfituesit e tjerë që paguajnë vetë të gjithë kontributin, pasi shteti ka kontribuar në skemën e fshatit në subvencionimin në vitin 2019 në shumën 1,980 milionë lekë, ose në masën 47.2% të të ardhurave të skemës dhe në vitin 2020 në shumën 1,684 milonë lekë, ose në masën 50.2% të të ardhurave të skemës”, thuhet në raport.
Ndër të tjera KLSH evidenton se, në disa fshatra janë shpërndarë më shumë subvencione në raport me numrin e fermerëve që kanë qenë të regjistruar në skemë. Kjo ka bërë që të krijohet deficit me 10,322,244 lekë në buxhetin e shtetit. Ndërsa humbja thellohet me faktin se ISSH nuk ka mbledhur si duhet kontributet nga të gjithë fermerët e regjistruar në skemë.
“Subvencionimi i lartë për kontributet nga buxheti i shtetit për bujqit, pjesëmarrja e ulët në skemë edhe për shkak të masës së lartë të kontributit referuar dhe produktivitet të ekonomive bujqësore, shpesh me sipërfaqe të vogla dhe jo efiçente, pamundësia e detyrimit për të paguar kontribute, si dhe lënia
mbi baza vullnetare e pagesës së kontributit, ka sjellë problematikat e skemës së fshatit, duke thelluar defiçitin e saj dhe mbulimin në masën më të madhe nga buxheti i shtetit”, thekson KLSH.
Nuk u shpërndanë pensionet
Një tjetër problem që evidenton KLSH është se gjatë pandemisë shumë pensionistët në fshat nuk kanë marrë pagesat që iu takojnë. Kjo evidentohet nga shifra më e ulët e pensionit të ndarë në raport me vlerën e 2019. “ Për vitin 2020 shpenzimet për pensionet e fshatit janë realizuar në shumën 13,676,769.000 lekë me një ulje prej 388,762.000 lekë nga viti 2019, të cilat i kanë përfituar 115,443 persona që marrin pension pleqërie, pension invaliditeti apo pensione familjare, si dhe shpenzimet për barrëlindje. Një pjesë e konisderueshme nuk kanë arritur të përfitojnë pagesat për shkak të izolimit që solli covid-19”, thekson KLSH.
Kujtojmë se në mars të 2020 kur qeveria vendosi të izolojë vendin, kryeministri Edi Rama tha se pensionistëve do t’iu shkojnë pagesat në shtëpi, por kjo ka qenë e pamundur për pensionistët e zonave të thella. Pavarësisht ankesave asnjë zgjidhje nuk u dha për pensionistët në zonat malore.
